Ngħinu lill-ekosistemi fl-Ewropa jadattaw għat-tibdil fil-klima

Dan ir-rapport jiġbor fil-qosor ħafna mill-ħidma bbażata fuq studji u workshops, magħmula minn, u għall-Grupp dwar it-Tibdil fil-Klima tan-Netwerk Ewropew tal-Kapijiet tal-Aġenziji għall-Konservazzjoni tan-Natura (ENCA) bejn l-2011 u l-2013. Il-Grupp ENCA dwar it-Tibdil fil-Klima huwa magħmul minn esperti fit-tibdil fil-klima u l-ekoloġija minn aġenziji tal-konservazzjoni tal-gvern madwar l-Ewropa.

Din id-dokumentazzjoni tippreżenta r-riżultati tal-ħidma fuq il-kwistjonijiet li ġejjin: 1) il-fehim konġunt dwar kif il-prinċipji tal-adattament għat-tibdil fil-klima jistgħu jiġu implimentati għal ekosistemi differenti, x'jista' jinvolvi dan fil-prattika u kif l-azzjoni għandha tiġi implimentata bl-aħjar mod; 2) l-ispeċifikazzjoni tal-azzjoni ta' adattament għal ekosistemi Ewropej differenti (eż. ekosistemi tal-muntanji u subartiċi inklużi ekosistemi tat-torbieri, ekosistemi tal-ilma ħelu u riparji, ekosistemi tal-foresti u ekosistemi kostali, bwar u ekosistemi urbani); 3) ħarsa ġenerali lejn il-kunċetti ewlenin tas-servizzi tal-ekosistema u l-Adattament ibbażat fuq l-Ekosistema (EbA);  4) analiżi fil-fond dwar żewġ aspetti tal-ġestjoni tal-adattament, jiġifieri ż-żieda fil-konnettività u l-approċċi għat-trażlokazzjoni jew il-migrazzjoni assistita inkluża analiżi tal-opportunitajiet u r-riskji; 5) stħarriġ ta' 72 proġett ta' konservazzjoni minn 16-il pajjiż li jittrattaw l-impatti tat-tibdil fil-klima fuq il-bijodiversità fl-Ewropa;   6) preżentazzjoni ta' studji ta' każijiet magħżula dwar l-adattament għall-impatti tat-tibdil fil-klima fuq il-bijodiversità.