L-implimentazzjoni tal-Qafas ta’ Hyogo għal Azzjoni fl-Ewropa Rapport ta’ Sinteżi Reġjonali 2011-2013

L-għan ewlieni ta' dan ir-rapport huwa li jidentifika x-xejriet ewlenin f'termini tal-progress li sar u l-isfidi ffaċċjati kemm fil-livell nazzjonali kif ukoll f'dak reġjonali permezz tal-implimentazzjoni tal-Qafas ta' Azzjoni ta' Hyogo (HFA) 2005-2015: Nibnu r-Reżiljenza tan-Nazzjonijiet u l-Komunitajiet għad-Diżastri fl-Ewropa bejn l-2011 u l-2013 u nqabblu l-progress li sar, it-tagħlimiet meħuda u l-isfidi li jridu jingħelbu meta mqabbla ma' dawk irrappurtati fl-2011 u fl-2009.

Dan ir-rapport ta’ sinteżi huwa bbażat fuq rapporti sottomessi minn pajjiżi u organizzazzjonijiet reġjonali li wieġbu għar-rekwiżiti ta’ monitoraġġ tal-HFA. Dawk il-pajjiżi li għadhom ma rrispondewx jibqgħu mhux rappreżentati. Filwaqt li f’xi pajjiżi twettqu eżerċizzji ta’ konsultazzjoni bħala parti mill-proċess ta’ rieżami, ir-rapporti huma awtovalutazzjonijiet mill-awtoritajiet nazzjonali mħejjija mill-Punti Fokali maħtura tal-HFA. Barra minn hekk, dan ir-rapport jippreżenta s-sejbiet tal-ewwel seba’ bliet Ewropej li lestew l-Għodda ta’ Awtovalutazzjoni tal-Gvern Lokali, sforz biex jiġi vvalutat u rrapportat il-progress li sar fil-bini ta’ bliet reżiljenti.

Dan huwa l-aħħar rapport reġjonali Ewropew tal-HFA li għandu jiġi ppubblikat qabel ma jintlaħaq ftehim dwar suċċessur għall-HFA, bħall-Konferenza Dinjija dwar it-Tnaqqis tar-Riskju tad-Diżastri skedata għar-rebbiegħa tal-2015. F'dak iż-żmien ser jintlaħaq qbil dwar strument ġdid u dan ser jiġi ppreżentat lill-Assemblea Ġenerali tan-Nazzjonijiet Uniti għall-approvazzjoni. Għalhekk huwa ttamat li dan ir-rapport se jinforma l-konsultazzjonijiet dwar kif l-aħjar titkompla l-ħidma tad-DRR fil-qafas għal wara l-2015.