LIFE u ħabitats kostali

Bħala s-sors prinċipali ta’ finanzjament fil-livell Ewropew għall-konservazzjoni tan-natura, il-Programm LIFE tal-Kummissjoni Ewropea għandu rwol kruċjali x’jaqdi fl-iżgurar tal-ġestjoni u r-restawr effettivi tan-network Natura 2000 fiż-żoni kostali u fl-ilħuq tal-objettivi ta’ konservazzjoni għall-ħabitats u l-ispeċijiet kostali. Il-pubblikazzjoni ta’ LIFE Nature Focus ta’ Ġunju 2017 turi l-ambitu tal-miżuri innovattivi u tal-aħjar prattiki mwettqa mill-proġetti LIFE biex itejbu l-istatus ta’ konservazzjoni u r-reżiljenza tal-ħabitats kostali madwar l-UE. Dawn ivarjaw minn laguni kostali, estwarji u bwar salmastri, għal duni, mergħat kostali u ħabitats tal-baħar qrib ix-xatt bħal sikek u mergħat tal-ħaxix tal-baħar. Il-proġetti LIFE għenu wkoll fl-indirizzar ta’ għadd ta’ kwistjonijiet trażversali ta’ ġestjoni tal-konservazzjoni, inkluż it-theddid maħluq minn speċijiet aljeni invażivi u t-tibdil fil-klima u l-isfida tar-rikonċiljazzjoni tan-negozju mal-bijodiversità. Tabilħaqq, il-proġetti li jidhru f’din il-pubblikazzjoni juru li l-konservazzjoni tal-kapital naturali ttejjeb ukoll il-provvista u l-kwalità tas-servizzi tal-ekosistema pprovduti miż-żoni kostali, inkluża l-protezzjoni kostali, u fl-aħħar mill-aħħar tappoġġa t-tkabbir ekonomiku u l-impjiegi.