Pjattaforma dwar il-finanzi sostenibbli: Tweġiba għall-konsultazzjoni: Abbozz ta’ Att Delegat dwar it-Tassonomija li jistabbilixxi l-kriterji tekniċi ta’ skrinjar għall-mitigazzjoni tat-tibdil fil-klima u l-adattament għalih

Dan id-dokument jistabbilixxi l-feedback mill-Pjattaforma lill-Kummissjoni Ewropea rigward l-ewwel abbozz ta’ Att Delegat li jissupplimenta r-Regolament dwar it-Tassonomija tal-UE (ir-Regolament (UE) 2020/852).

F’Novembru 2020, il-Kummissjoni ħarġet l-abbozz ta’ Att Delegat li jistabbilixxi kriterji tekniċi ta’ skrinjar biex jiġi ddeterminat meta l-attivitajiet ekonomiċi jistgħu jikkontribwixxu b’mod sostanzjali għall-mitigazzjoni tat-tibdil fil-klima u l-adattament għalih, u meta jistgħu jitqiesu li jikkawżaw ħsara sinifikanti lil objettivi ambjentali oħra fil-kuntest tat-Tassonomija tal-UE.

Il-Pjattaforma ffukat il-kummenti tagħha f’din it-tweġiba fuq l-abbozz tal-Att Delegat li jistabbilixxi l-kriterji tekniċi ta’ skrinjar għall-objettivi tat-tibdil fil-klima. Il-Pjattaforma tinnota wkoll għadd limitat ta’ kwistjonijiet ta’ użu li jirriżultaw minħabba dan l-abbozz ta’ Att Delegat, iżda li jistgħu jkunu rilevanti għal inizjattivi oħra li għaddejjin bħalissa. Il-Kummissjoni se tadotta regoli u gwida sussegwenti rigward it-Tassonomija, inkluż: Att Delegat li jistabbilixxi l-kontenut, il-preżentazzjoni u l-metodoloġiji għall-konformità mar-rekwiżiti ta’ divulgazzjoni skont l-Artikolu 8 tar-Regolament dwar it-Tassonomija, li għandu jiġi adottat sal-1 ta’ Ġunju 2021; Standards Tekniċi Regolatorji li jispeċifikaw id-dettalji tal-kontenut u l-preżentazzjoni tar-rekwiżiti ta’ divulgazzjoni skont l-Artikoli 5 u 6 tar-Regolament dwar it-Tassonomija, li għandhom jiġu adottati sal-1 ta’ Ġunju 2021 għall-objettivi tat-tibdil fil-klima. Il-mandat tal-Pjattaforma jinkludi l-għoti ta’ pariri kontinwi dwar l-użu tat-Tassonomija. F’dan il-kuntest, il-Pjattaforma bħalissa qed tivvaluta t-tħejjija tas-suq għall-obbligi ta’ divulgazzjoni u tidentifika d-disponibbiltà u l-limitazzjonijiet tad-data.