Valutazzjoni preliminari tar-riskju ta’ għargħar

Dan ir-rapport twettaq b'konformità mar-rekwiżit ta' Malta skont l-Artikolu 4 tad-Direttiva Ewropea dwar l-Għargħar li jirrikjedi li l-Istati Membri kollha jwettqu Valutazzjoni Preliminari tar-Riskju ta' Għargħar (PFRA) għal kull distrett ta' baċin tax-xmara, unità ta' ġestjoni tal-parti ta' distrett ta' baċin tax-xmara internazzjonali, jew unità ta' ġestjoni li tinsab fit-territorju tagħhom. Il-valutazzjoni ppreżentata f’dan ir-rapport qieset it-tipi kollha ta’ għargħar, inklużi s-sorsi naturali, bħal dak li jista’ jseħħ mix-xmajjar, mill-baħar u mill-estwarji, mix-xita qawwija u mill-ilma ta’ taħt l-art, u l-falliment tal-infrastrutturi mibnija. Hija qieset ukoll l-impatti li l-għargħar jista’ jkollu fuq in-nies, il-proprjetà, in-negozju, l-ambjent u l-wirt kulturali.

Ir-rapport huwa magħmul minn ħames taqsimiet ewlenin: (i) ħarsa ġenerali lejn id-distrett tal-baċin tax-xmara; (ii) analiżi tas-sorsi potenzjali ta' l-għargħar; (iii) deskrizzjoni tas-sorsi ta' l-għargħar tal-passat; (iv) valutazzjoni tal-konsegwenzi negattivi potenzjali ta' għargħar fil-ġejjieni li tinkludi l-impatti tal-bidla fil-klima fuq l-okkorrenza ta' l-għargħar; u (v) sommarju ġenerali u konklużjonijiet tal-PFRA.