Reġistrazzjoni tat-Telf mid-Diżastri: Rakkomandazzjoni għal approċċ Ewropew

Fi studju kkummissjonat mid-Direttorat Ġenerali għall-Għajnuna Umanitarja u l-Protezzjoni Ċivili tal-Kummissjoni Ewropea, iċ-Ċentru Konġunt tar-Riċerka jifformula rakkomandazzjonijiet tekniċi għal approċċ Ewropew biex jiġu standardizzati d-databases tat-telf.  Id-data dwar it-telf hija utli għall-implimentazzjoni ta’ strateġiji għat-tnaqqis tar-riskju ta’ diżastri fl-Ewropa (minn skali lokali għal dawk nazzjonali) u biex tgħin fil-fehim tax-xejriet tat-telf mid-diżastri fil-livell globali.  Filwaqt li jqis ix-xogħol eżistenti, l-istudju jiddefinixxi qafas kunċettwali għall-utilità tad-data dwar it-telf li jippermetti analiżi tal-ispejjeż imqabbla mal-benefiċċji tax-xenarji ta’ implimentazzjoni.   Il-qafas qies il-kontabbiltà tat-telf, il-forensika għad-diżastri u l-immudellar tar-riskju bħala applikazzjonijiet ewlenin. Skont l-iskala (id-dettalji tar-reġistrazzjoni) u l-ambitu (il-kopertura ġeografika), ir-rekwiżiti tekniċi se jkunu xi ftit jew wisq stretti, u l-ispejjeż tal-implimentazzjoni se jvarjaw skont dan.  Ir-rekwiżiti tekniċi proposti f’dan l-istudju jiddependu kemm jista’ jkun fuq l-istandards eżistenti, l-aħjar prattiki u l-approċċi li jinsabu fil-letteratura, fl-organizzazzjonijiet internazzjonali u nazzjonali u fl-istituzzjonijiet akkademiċi.  Ir-rekwiżiti jkopru reġistrazzjoni dettaljata ħafna (fil-livell tal-assi) kif ukoll reġistrazzjoni fuq skala kbira.  Il-limitazzjonijiet u l-opportunitajiet tal-leġiżlazzjoni eżistenti tal-UE jitqiesu bħala l-kuntest tal-UE.