Xjenza għall-Ġestjoni tar-Riskju ta’ Diżastri 2020: Naġixxu llum, nipproteġu għada

Din il-pubblikazzjoni, it-tieni waħda mis-serje tagħha, tħejjiet miċ-Ċentru ta’ Għarfien għall-Ġestjoni tar-Riskju ta’ Diżastri (DRMKC) tal-Kummissjoni Ewropea bil-kollaborazzjoni ta’ aktar minn 300 espert fil-ġestjoni tar-riskju ta’ diżastri (DRM).

Ir-rapport jittratta l-perikli ta’ natura differenti, filwaqt li jenfasizza l-ħafna rabtiet li jeżistu bejn il-perikli u l-vulnerabbiltajiet biex tiġi appoġġata azzjoni robusta u effettiva. Ir-rapport jipprovdi ħarsa ġenerali lejn il-konsegwenzi li d-diżastri għandhom fuq l-assi ewlenin tas-soċjetà (il-popolazzjoni, is-setturi ekonomiċi, l-infrastrutturi kritiċi, l-ambjent u l-wirt kulturali). L-istudju tal-impatti jgħin fil-ġestjoni tar-riskju wara diżastru, jiggwida r-rispons u jiffaċilita l-irkupru, u fit-tħejjija ta’ miżuri għall-prevenzjoni, il-mitigazzjoni u t-tħejjija għal avvenimenti futuri, billi jappoġġa t-tbassir tar-riskju u l-ippjanar ta’ miżuri għall-ġestjoni tar-riskju.

Id-diversi kapitoli u sottokapitoli jipprovdu wkoll rakkomandazzjonijiet speċifiċi għall-udjenza fil-mira, erba’ gruppi ta’ partijiet ikkonċernati li jistgħu jikkontribwixxu b’mod attiv għat-tnaqqis tar-riskju ta’ diżastri: dawk li jfasslu l-politika, il-prattikanti (bħall-gruppi tal-protezzjoni ċivili, l-operaturi tal-infrastruttura kritika u l-gruppi ċivili organizzati involuti direttament fir-rispons għad-diżastri), ix-xjenzati u ċ-ċittadini.

Biex nimxu mill-identifikazzjoni tal-problemi għall-preżentazzjoni ta' soluzzjonijiet u approċċi, ir-rapport jiddeskrivi diversi eżempji u każijiet, u juri x'tgħallmet il-komunità tad-DRM minn avvenimenti diżastrużi filwaqt li jindika fejn jinsabu l-lakuni fl-għarfien tagħna.