L-istat tal-ibħra tal-Ewropa - Rapport tal-EEA Nru 2/2015

L-għan ewlieni ta’ dan ir-rapport huwa li jivvaluta jekk l-ibħra tal-Ewropa jistgħux jitqiesu b’saħħithom, nodfa u mhux disturbati, u produttivi. Dawn huma tliet aspetti ewlenin tal-istrument ewlieni tal-politika tal-baħar tal-UE — id-Direttiva Kwadru dwar l-Istrateġija Marina — u huma relatati mal-kundizzjoni tal-ekosistemi tal-baħar u l-ixprunaturi umani tal-bidla fl-ekosistema. Din il-valutazzjoni tinvolvi wkoll l-identifikazzjoni tal-isfidi ewlenin tas-sostenibbiltà li jaffettwaw l-ibħra tagħna, u kif l-UE qed twieġeb għal dawn l-isfidi. Fl-aħħar mill-aħħar, ir-rapport jargumenta li l-UE mhijiex fit-triq biex tissodisfa l-ambizzjoni tagħha li tikseb użu sostenibbli tal-ibħra tagħha; għalkemm għandha s-setgħa sħiħa li tagħmel dan permezz tal-firxa attwali ta’ politiki u għarfien. Dan ir-rapport jiddiskuti wkoll kif tranżizzjoni fit-tul għas-sostenibbiltà tista’ mbagħad tiġi żgurata bl-użu tal-politiki u l-għarfien disponibbli.
Ir-rapport jindirizza b’mod wiesa’ l-effetti mistennija (eż. fuq il-kimika u l-fiżika tal-oċeani, il-bijodiversità tal-baħar, id-distribuzzjoni tal-ispeċijiet, id-dinamika tal-popolazzjoni, id-distribuzzjoni ta’ speċijiet mhux indiġeni, is-sajd, l-ewtrofikazzjoni, il-kontaminazzjoni, l-attivitajiet tal-bniedem tal-baħar u kostali) tat-tibdil fil-klima fl-ibħra tal-Ewropa, bħal b’mod partikolari dawk relatati ma’: iż-żieda fit-temperaturi tal-baħar, l-aċidifikazzjoni tal-oċeani u l-aggravar ta’ pressjonijiet oħra li jaġixxu fuq l-ibħra. Il-valutazzjoni targumenta li t-tibdil fil-klima diġà qed ikollu effett negattiv fuq l-ibħra tal-Ewropa billi jsaħħan u jaċifika l-ilmijiet tagħha. Pereżempju waħda mill-konsegwenzi viżibbli tat-tibdil antropoġeniku fil-klima hija l-bidliet fid-distribuzzjoni tal-ispeċijiet tal-baħar lejn reġjuni aktar fit-Tramuntana (u għalhekk aktar kesħin), jiġifieri ta’ speċijiet b’valur kummerċjali bħal dawk fil-mira tas-sajd. Dan it-tibdil ikkawżat mill-klima fil-ġeografija tal-ispeċijiet tal-baħar jaffettwa wkoll ir-relazzjonijiet internazzjonali umani, kif muri mill-kunflitt fost il-pajjiżi li jikkondividu r-riżorsi tal-ħut fl-ibħra tat-Tramuntana tal-Ewropa. Ir-rapport janalizza wkoll is-servizz ta’ regolamentazzjoni pprovdut mill-ibħra f’termini ta’ “regolamentazzjoni tal-klima permezz tas-sekwestru tal-karbonju”.