It-tisħiħ tar-reżiljenza tal-wirt kulturali għat-tibdil fil-klima - Fejn il-Patt Ekoloġiku Ewropew jiltaqa’ mal-wirt kulturali

Il-Patt Ekoloġiku Ewropew huwa r-rispons tal-Ewropa għall-isfidi l-kbar li t-tibdil fil-klima joħloq għas-soċjetajiet tagħna u għandu l-għan li jagħmel lill-Ewropa l-ewwel kontinent newtrali għall-klima sal-2050. F’konformità mal-impenji li saru skont il-Ftehim ta’ Pariġi, dan ifittex li jittrasforma l-UE f’ekonomija moderna, effiċjenti fl-użu tar-riżorsi u kompetittiva, mingħajr emissjonijiet netti ta’ gassijiet serra sal-2050, tkabbir ekonomiku diżakkoppjat mill-użu tar-riżorsi u l-ebda persuna jew post ma jitħalla jibqa’ lura. Madankollu, il-wirt kulturali ma ssemmiex b’mod espliċitu fil-Patt Ekoloġiku. Fl-istess ħin, f’konformità mal-Pjan ta’ Ħidma għall-Kultura 2019-2022, ġie stabbilit grupp tal-Metodu Miftuħ ta’ Koordinazzjoni tal-esperti tal-Istati Membri dwar it-tisħiħ tar-reżiljenza tal-wirt kulturali għat-tibdil fil-klima. Il-mandat tal-grupp kien li jesplora l-kontributi tal-wirt kulturali għall-Patt Ekoloġiku Ewropew u jidentifika t-theddid u l-lakuni relatati mal-wirt kulturali fil-kuntest tat-tibdil fil-klima.

Il-wirt kulturali tagħna qed issirlu ħsara u jintilef bħala riżultat tat-tibdil fil-klima, li qed javvanza b’veloċità u skala mingħajr preċedent. Fl-istess ħin, il-wirt kulturali joffri soluzzjonijiet ekoloġiċi u sostenibbli għall-kriżi klimatika. Soluzzjoni ewlenija hija r-rinnovazzjoni ta’ bini antik, li ntwera li ma jagħmilx ħsara lill-klima aktar mit-twaqqigħ. Ir-riċerka u l-innovazzjoni huma muturi indispensabbli tal-bidla li jistgħu jagħtu kontributi sostanzjali fil-ġlieda kontra t-tibdil fil-klima. Il-miżuri ta’ adattament u mitigazzjoni jridu jkunu konformi mal-prinċipji tal-kwalità biex tiġi żgurata l-protezzjoni tal-wirt kulturali, filwaqt li jiġi evitat adattament ħażin li jirriżulta fi kriżi tal-wirt kulturali. Miżuri xierqa se jistimulaw ir-reżiljenza għat-tibdil fil-klima, l-irkupru ekonomiku u l-iżvilupp tal-ħiliet f’konformità mal-Patt Ekoloġiku Ewropew. L-isforz konġunt tal-Ewropa, li diġà pproduċa eżempji ta’ prattika tajba, se jkun sors ta’ ispirazzjoni għal reġjuni oħra tad-dinja.