Studju tal-Attivitajiet ta’ Adattament fil-Livell Reġjonali fl-UE

L-objettiv ta’ dan l-istudju huwa li jiġu esplorati r-rwol u r-rilevanza tal-livell reġjonali għall-adattament għat-tibdil fil-klima fl-Istati Membri tal-UE. Ir-reġjuni jistgħu jaqdu rwol importanti u, f’xi każijiet, huma l-aktar livell xieraq ta’ governanza biex jiġi indirizzat it-tibdil fil-klima.

Għal dan l-istudju twettqet riċerka dwar l-adattament għat-tibdil fil-klima f’kull wieħed mit-28 Stat Membru tal-UE, li tikkonsisti f’riċerka bbażata biss fuq id-dokumentazzjoni u kuntatti ma’ esperti u awtoritajiet ewlenin u rieżami tal-istatus attwali tal-ippjanar u l-azzjoni tal-adattament fil-livell reġjonali. Dan jiġbor fil-qosor is-sejbiet ewlenin dwar l-adattament reġjonali u jirrieżamina r-rwol u r-rilevanza tal-livell reġjonali fl-adattament għat-tibdil fil-klima għal kull wieħed mit-28 Stat Membru tal-UE. Ir-riżultati dettaljati huma rreġistrati fis-sett ta’ matriċijiet tal-Istati Membri li jinsabu fl-Anness 1. B’mod ġenerali fl-EU-28, f’pajjiżi fejn ir-reġjuni għandhom kompetenza għal xi taħlita ta’ politika ambjentali, ippjanar spazjali jew implimentazzjoni ta’ miżuri ta’ adattament, il-livell attwali ta’ progress fl-adattament ivarja b’mod konsiderevoli.

Il-livell ta’ progress fl-adattament fir-reġjuni jiddependi fuq ħafna fatturi. Xi fatturi - bħall-obbligi legali jew l-evidenza tal-impatti tat-tibdil fil-klima (eż. għargħar) - jixprunaw l-azzjoni ta’ adattament. Oħrajn, bħal nuqqas ta’ għarfien jew nuqqas ta’ fondi, huma ostakli. Ir-rapport jiddiskuti xi wħud minn dawn il-fatturi, abbażi ta’ rieżami tal-letteratura u intervisti ma’ uffiċjali u esperti fl-Istati Membri.

Ir-rapport jinkludi wkoll taqsima dwar prattiki tajbin fl-adattament fil-livell reġjonali, inklużi attivitajiet transkonfinali li jistgħu jiġu kondiviżi fost dawk li jfasslu l-politika madwar l-Istati Membri u r-reġjuni tal-UE.

Fil-biċċa l-kbira tal-Istati Membri, ir-reġjuni huma interfaċċa kritika bejn il-livelli nazzjonali u lokali ta’ governanza u għandhom rwol kemm fl-ippjanar strateġiku kif ukoll fl-implimentazzjoni konkreta tal-miżuri. Jingħataw
rakkomandazzjonijiet għal appoġġ politiku, finanzjarju u tekniku għall-progress fl-adattament fil-livell reġjonali biex tinbena r-reżiljenza madwar l-UE u jiġi żgurat żvilupp fit-tul li jkun kompatibbli mal-impatti ta’ klima li qed tinbidel.