Ir-rapport Ewropa 2024 tal-Lancet Countdown dwar is-saħħa u t-tibdil fil-klima: it-tisħin bla preċedent jitlob azzjoni bla preċedent

Fl-2023 ġew irreġistrati temperaturi rekord madwar id-dinja. Mingħajr azzjoni klimatika, l-impatti negattivi fuq is-saħħa relatati mal-klima huma mistennija li jmorru għall-agħar madwar id-dinja, u jaffettwaw biljuni ta’ nies. It-temperaturi fl-Ewropa qed jisħnu bid-doppju tar-rata tal-medja globali, u qed jheddu s-saħħa tal-popolazzjonijiet madwar il-kontinent u jwasslu għal telf ta’ ħajjiet bla bżonn. Il-Lancet  Countdown fl-Ewropa ġie stabbilit fl-2021, biex jivvaluta l-profil tas-saħħa tat-tibdil fil-klima bl-għan li jistimula r-rieda soċjali u politika Ewropea biex jiġu implimentati azzjonijiet rapidi ta’ mitigazzjoni u adattament għat-tibdil fil-klima li jirrispondu għas-saħħa. Fl-2022, il-kollaborazzjoni ppubblikat ir-rapport tal-indikaturi tagħha, li jsegwi l-progress fis-saħħa u t-tibdil fil-klima permezz ta’ 33 indikatur u f’ħames oqsma.

Dan ir-rapport il-ġdid tal-2024 isegwi 42 indikatur li jenfasizzaw l-impatti negattivi tat-tibdil fil-klima fuq is-saħħa tal-bniedem, id-dewmien fl-azzjoni klimatika tal-pajjiżi Ewropej, u l-opportunitajiet mitlufa biex tiġi protetta jew imtejba s-saħħa b’azzjoni klimatika reattiva għas-saħħa. Il-metodi wara l-indikaturi ppreżentati fir-rapport tal-2022 tjiebu, u żdiedu disa’ indikaturi ġodda, li jkopru l-leishmaniasis, il-qurdien, is-sigurtà tal-ikel, l-emissjonijiet tal-kura tas-saħħa, l-emissjonijiet ibbażati fuq il-produzzjoni u l-konsum, l-investiment fl-enerġija nadifa, u l-involviment xjentifiku, politiku u tal-media mal-klima u s-saħħa. Meta wieħed iqis li l-impatti negattivi fuq is-saħħa relatati mal-klima u r-responsabbiltà għat-tibdil fil-klima mhumiex ugwali fil-livelli reġjonali u globali, dan ir-rapport jagħmel ħiltu wkoll biex jirrifletti dwar aspetti ta’ inugwaljanza u ġustizzja billi jenfasizza l-gruppi f’riskju fl-Ewropa u r-responsabbiltà tal-Ewropa għall-kriżi klimatika.