Id-domanda għall-finanzjament ta’ proġetti klimatiċi fil-bliet

Ir-rapport, ibbażat fuq id-data meħuda minn 106 applikazzjonijiet għal appoġġ riċevuti mill-Faċilità ta’ Finanzjament tal-Bliet C40 fl-2018, minn 1,037 proġett sottomessi lill-Proġett ta’ Divulgazzjoni tal-Karbonju (CDP) fl-2017 u mill-Kwestjonarju tal-Bliet CDP tal-2017, iwieġeb il-mistoqsijiet li ġejjin:

• X’inhuma l-karatteristiċi komuni tal-proġetti relatati mal-klima li għalihom il-bliet ifittxu t-tħejjija tal-proġetti u l-appoġġ għall-finanzjament?
• X’inhuma s-setturi u l-firxa ġeografika ta’ dawn il-proġetti?
• X’inhi l-iskala tal-investiment kapitali meħtieġ għal dawn il-proġetti?
• X’inhuma l-benefiċċji klimatiċi u l-kobenefiċċji ta’ dawn il-proġetti?
• X’tip ta’ appoġġ qed jitolbu l-bliet biex jipproċedu għall-implimentazzjoni?
• Liema sfidi għall-implimentazzjoni tal-proġetti qed jiffaċċjaw il-bliet bħalissa?

L-ewwel nett, ir-rapport jiddeskrivi l-metodoloġija użata għall-valutazzjoni tal-proġetti fiż-żewġ bażijiet tad-data. It-tieni nett, il-karatteristiċi tal-proġetti huma deskritti bħala risposti għad-domandi msemmija iktar ’il fuq. It-tielet, is-sejbiet ewlenin huma deskritti, u dan iwassal għal rakkomandazzjonijiet speċifiċi għall-partijiet ikkonċernati.

Ir-rapport jikkonkludi li għad hemm għadd limitat ta’ proġetti ta’ adattament fiż-żewġ kampjuni (7 % tal-applikazzjonijiet tas-CFF, u 3 % biss tas-sottomissjonijiet tal-bliet lis-CDP), meta mqabbla ma’ proġetti ta’ mitigazzjoni. L-għadd limitat jista’ jkun dovut għal diffikultajiet fil-kunċettwalizzazzjoni tal-proġetti ta’ adattament, b’mod partikolari dwar l-identifikazzjoni u l-kejl tal-benefiċċji relatati mal-adattament għat-tibdil fil-klima.