L-ambjent Ewropew — l-istat u l-prospetti 2020: għarfien għal tranżizzjoni lejn Ewropa sostenibbli

Fl-2020, l-Ewropa qed tiffaċċja sfidi ambjentali ta’ skala u urġenza bla preċedent.

Għalkemm il-politiki tal-UE dwar l-ambjent u l-klima wasslu għal benefiċċji sostanzjali matul dawn l-aħħar deċennji, l-Ewropa qed tiffaċċja problemi persistenti f’oqsma bħat-telf tal-bijodiversità, l-użu tar-riżorsi, l-impatti tat-tibdil fil-klima u r-riskji ambjentali għas-saħħa u l-benesseri. Il-megatendenzi globali bħat-tibdil demografiku qed jintensifikaw ħafna sfidi ambjentali, filwaqt li bidla teknoloġika rapida ġġib magħha riskji u inċertezzi ġodda.

L-UE impenjat ruħha għal firxa ta’ għanijiet ta’ sostenibbiltà fit-tul bl-għan ġenerali li “ngħixu tajjeb, fil-limiti tal-pjaneta tagħna”. Il-kisba ta’ dawn l-għanijiet mhux se tkun possibbli mingħajr bidla rapida u fundamentali fil-karattru u l-ambizzjoni tar-reazzjonijiet tal-Ewropa.

Jeħtieġ li l-Ewropa ssib modi kif tittrasforma s-sistemi soċjetali ewlenin li jixprunaw il-pressjonijiet ambjentali u klimatiċi u l-impatti fuq is-saħħa — billi tikkunsidra mill-ġdid mhux biss it-teknoloġiji u l-proċessi tal-produzzjoni iżda wkoll ix-xejriet tal-konsum u l-modi ta’ għajxien. Dan se jirrikjedi azzjoni immedjata u miftiehma, li tinvolvi diversi oqsma ta’ politika u atturi fis-soċjetà kollha biex tippermetti bidla sistemika.