Il-Futur tal-Bliet

Dan ir-rapport huwa inizjattiva taċ-Ċentru Konġunt tar-Riċerka (JRC), appoġġat mid-Direttorat Ġenerali tal-Kummissjoni għall-Politika Reġjonali u Urbana (DĠ REGIO). Dan jenfasizza l-ixprunaturi li jsawru l-futur urban, filwaqt li jidentifika kemm l-isfidi ewlenin li l-bliet se jkollhom jindirizzaw kif ukoll il-punti b’saħħithom li jistgħu jikkapitalizzaw fuqhom biex jibnu l-futur mixtieq tagħhom b’mod proattiv. L-għan ewlieni ta’ dan ir-rapport huwa li jqajjem mistoqsijiet miftuħa u jmexxi d-diskussjonijiet dwar x’jista’ u x’għandu jkun il-futur tal-bliet, kemm fi ħdan il-komunitajiet xjentifiċi kif ukoll f’dawk li jfasslu l-politika. Filwaqt li jindirizzaw prinċipalment il-bliet Ewropej, jingħataw ukoll eżempji minn reġjuni oħra tad-dinja peress li ħafna sfidi u soluzzjonijiet għandhom rilevanza globali.

Ir-rapport huwa partikolarment ġdid b'żewġ modi. L-ewwel nett, ġie żviluppat b’mod inklużiv – kollaborazzjoni mill-qrib mal-Komunità ta’ Prattika dwar il-Bliet (CoP-CITIES) tal-KE pprovdiet għarfien mill-komunità usa’ tar-riċerka u min-networks tal-bliet, inklużi muniċipalitajiet individwali, kif ukoll servizzi tal-Kummissjoni u organizzazzjonijiet internazzjonali. Ġie wkoll rivedut b'mod estensiv minn Bord Editorjali. It-tieni nett, ir-rapport huwa appoġġat minn pjattaforma interattiva online li se tospita aġġornamenti futuri, inklużi analiżijiet addizzjonali, diskussjonijiet, studji ta’ każijiet, kummenti u mapep interattivi li jmorru lil hinn mill-kamp ta’ applikazzjoni tal-verżjoni attwali tar-rapport.

Ir-rapport kollu jirreferi għall-impatti li l-bliet għandhom fuq it-tibdil fil-klima, ix-xejra u kif għandhom jiġu indirizzati. B’mod partikolari, waħda mill-isfidi ppreżentati hija ddedikata għall-azzjoni klimatika, li tissottolinea erba’ massaġġi ewlenin:

• Filwaqt li huma responsabbli għal livell għoli ta’ konsum tal-enerġija u, għalhekk, jiġġeneraw madwar 70 % tal-emissjonijiet globali tal-gassijiet serra, il-bliet huma partikolarment vulnerabbli għall-impatti tat-tibdil fil-klima.
• Il-bliet huma l-aktar effettivi biex jieħdu miżuri biex jindirizzaw it-tibdil fil-klima meta jkunu allinjati ma’ xulxin u ma’ atturi fil-livell nazzjonali u reġjonali li magħhom jistgħu jikkondividu ambizzjoni u kapaċità klimatiċi akbar.
• F’dawn l-aħħar żewġ deċennji, l-ambizzjoni tal-bliet żdiedet b’mod notevoli biex tmur lil hinn mill-miri tat-tibdil fil-klima tal-gvernijiet nazzjonali peress li r-Rapport Speċjali tal-IPCC dwar it-Tisħin Globali ta’ 1,5 °C iwissi li l-kontributi attwali stabbiliti fil-livell nazzjonali għall-Ftehim ta’ Pariġi mhumiex biżżejjed.
• Il-bliet jeħtieġu appoġġ mis-sħab tagħhom fil-gvernijiet nazzjonali u reġjonali, is-settur privat, l-akkademja, u s-soċjetà ċivili biex jilħqu u jaqbżu bis-sħiħ dawn il-miri ambizzjużi.