Perkors ta’ Tranżizzjoni għat-Turiżmu

Fl-10 ta’ Marzu 2020, il-Kummissjoni adottat strateġija industrijali ġdida. L-għan kien li l-industrija tal-UE tiġi megħjuna tmexxi t-trasformazzjonijiet ekoloġiċi u diġitali u li tingħata spinta lill-kompetittività globali tal-UE u lill-awtonomija strateġika miftuħa. Fid-dawl tal-esperjenza tal-pandemija tal-COVID-19, l-aġġornament tal-istrateġija industrijali tal-UE enfasizza l-ħtieġa li jiġu aċċellerati aktar it-tranżizzjonijiet ekoloġiċi u diġitali u li tiżdied ir-reżiljenza tal-ekosistemi industrijali tal-UE. Biex tagħmel dan, il-Kummissjoni pproponiet it-tnedija ta’ perkorsi ta’ tranżizzjoni li jinħolqu b’mod konġunt mal-partijiet ikkonċernati, bħala proċess kollaborattiv essenzjali biex jgħin fit-trasformazzjoni tal-ekosistemi industrijali. Peress li l-ekosistema tat-turiżmu kienet l-aktar milquta mill-pandemija u qed tiffaċċja sfidi kbar biex tikseb it-tranżizzjoni doppja, din kienet l-ewwel ekosistema industrijali li fiha tnieda proċess ta’ kokreazzjoni biex jiġi żviluppat perkors ta’ tranżizzjoni. L-għan ta’ dan ir-rapport huwa li jiddeskrivi l-miżuri u l-outputs meħtieġa biex jiġu aċċellerati t-tranżizzjonijiet ekoloġiċi u diġitali u tittejjeb ir-reżiljenza tal-ekosistema tat-turiżmu. L-objettiv huwa li l-gruppi u l-partijiet ikkonċernati kollha fl-ekosistema tat-turiżmu jiġu mħeġġa u mistiedna jinvolvu ruħhom u jagħtu sehemhom fl-inizjattiva. Il-ħidma għat-tħejjija tal-perkors segwiet approċċ kollaborattiv li jinvolvi l-gruppi kollha tal-partijiet ikkonċernati. Kollaborazzjoni attiva u produttiva simili għandha tappoġġa wkoll it-triq ’il quddiem. Wara l-pubblikazzjoni ta’ dan ir-rapport, il-Kummissjoni se tistieden lill-partijiet ikkonċernati tat-turiżmu biex jippreżentaw l-impenji tagħhom għall-perkors ta’ tranżizzjoni għat-turiżmu, u se tistabbilixxi proċessi ta’ kollaborazzjoni għall-koimplimentazzjoni u l-monitoraġġ tal-ħidma. Is-segwitu tal-perkors ta’ tranżizzjoni se jiġi ffaċilitat permezz ta’ pjattaforma ta’ kollaborazzjoni online mal-partijiet ikkonċernati, li għandha tiġi stabbilita sa tmiem l-2022. Il-ħidma fuq il-perkors ta' tranżizzjoni tissodisfa wkoll it-talba tal-Kunsill Ewropew fil-konklużjonijiet tiegħu tas-27 ta' Mejju 20213 biex jistieden "lill-Kummissjoni u lill-Istati Membri, f'parteċipazzjoni mal-partijiet ikkonċernati rilevanti, biex ifasslu Aġenda Ewropea għat-Turiżmu 2030/2050". Is-segwitu għall-inizjattivi tal-Istati Membri u għall-Aġenda tal-UE għat-Turiżmu se jkun appoġġat mill-Kumitat Konsultattiv dwar it-Turiżmu. Il-Kummissjoni se żżomm ukoll lill-Kunsill infurmat dwar il-progress fl-implimentazzjoni konġunta tal-perkors tat-tranżizzjoni tat-turiżmu permezz tal-Grupp ta’ Ħidma dwar it-Turiżmu. Il-Forum Industrijali jissorvelja l-perkorsi ta’ tranżizzjoni tal-ekosistemi industrijali kollha u se jiġi aġġornat regolarment ukoll dwar il-progress fil-perkors ta’ tranżizzjoni għat-turiżmu.