Rapport Dinji tan-Nazzjonijiet Uniti dwar l-Iżvilupp tal-Ilma

L-evidenza xjentifika hija ċara: il-klima qed tinbidel u se tkompli tinbidel, u taffettwa lis-soċjetajiet prinċipalment permezz tal-ilma.

It-tibdil fil-klima ser jaffettwa d-disponibbiltà, il-kwalità u l-kwantità tal-ilma għall-ħtiġijiet bażiċi tal-bniedem, u jhedded it-tgawdija effettiva tad-drittijiet tal-bniedem għall-ilma u s-sanità għal potenzjalment biljuni ta' persuni. Ir-Rapport Dinji tan-Nazzjonijiet Uniti dwar l-Iżvilupp tal-Ilma tal-2020 jiffoka kemm fuq l-isfidi kif ukoll fuq l-opportunitajiet maħluqa mit-tibdil fil-klima u jipprovdi risponsi potenzjali f’termini ta’ adattament, mitigazzjoni u reżiljenza mtejba li jistgħu jitwettqu biex tissaħħaħ il-ġestjoni tar-riżorsi tal-ilma li tnaqqas ir-riskji relatati mal-ilma u ttejjeb l-aċċess għall-provvista tal-ilma u għas-servizzi tas-sanità. 

L-alterazzjoni taċ-ċiklu tal-ilma se toħloq ukoll riskji għall-produzzjoni tal-enerġija, is-sigurtà tal-ikel, is-saħħa tal-bniedem, l-iżvilupp ekonomiku u t-tnaqqis tal-faqar, u b’hekk tipperikola serjament il-kisba tal-Għanijiet ta’ Żvilupp Sostenibbli. Il-kombinazzjoni tal-adattament u l-mitigazzjoni tat-tibdil fil-klima, permezz tal-ilma, hija proposta ta’ benefiċċju għal kulħadd, li ttejjeb il-provvista tal-ilma u s-servizzi sanitarji u tiġġieled kemm il-kawżi kif ukoll l-impatti tat-tibdil fil-klima, inkluż it-tnaqqis tar-riskju ta’ diżastri.