Treoir maidir leis an Athrú Aeráide agus an Bhithéagsúlacht a Chomhtháthú i Measúnú Straitéiseach Comhshaoil.

Aithnítear an gá atá le gníomhaíocht maidir leis an athrú aeráide agus cailliúint na bithéagsúlachta ar fud na hEorpa agus ar fud an domhain. Chun dul chun cinn a dhéanamh maidir leis an athrú aeráide a chomhrac agus oiriúnú dó, agus stop a chur le cailliúint na bithéagsúlachta agus le díghrádú na n-éiceachóras, tá sé ríthábhachtach na saincheisteanna sin a chomhtháthú go hiomlán sna pleananna, sna cláir agus sna tionscadail a chuirtear chun feidhme ar fud an Aontais. Is féidir le Measúnú Comhshaoil cur le comhtháthú an athraithe aeráide go luath agus ar an gcaoi sin leochaileacht a laghdú agus athléimneacht na gcóras nádúrtha agus daonna a mhéadú. Cuirtear treoirlínte agus moltaí ar fáil sa tuarascáil chun an t-athrú aeráide agus an bhithéagsúlacht a chomhtháthú sa Mheasúnú Straitéiseach Comhshaoil (MSC). Ós rud é go bhfuil dlúthbhaint idir an t-athrú aeráide agus cailliúint na bithéagsúlachta — amhail an oiread sin saincheisteanna comhshaoil eile atá romhainn — cumhdaítear iad sa treoir chéanna.