Treoirlínte maidir le Caillteanas ó Thubaistí a Thomhas: Táscairí Tionchair Dhaonna agus Eacnamaíoch

Is é tuiscint agus doiciméadú ar thionchair ó ghuaiseacha nádúrtha an bunús le haghaidh cinnteoireachta agus le haghaidh beartais a leagan síos maidir le rioscaí tubaiste a laghdú. I measc na dtionchar tá éifeachtaí daonna amhail easáitiú, easpa dídine agus bás, an comhshaol (caillteanas bogaigh, fairsingiú fásaigh) agus caillteanais eacnamaíocha (damáiste do mhaoin agus do bharra). Tá sé dúshlánach tionchair a dhoiciméadú ar bhealach caighdeánaithe agus cuimsitheach den chuid is mó mar gheall ar easpa téarmaíochta coiteanna le haghaidh priacail, modheolaíochtaí tomhais, agus táscairí caillteanais dhaonna. Cuireann an neamhábaltacht caillteanais thar ghuaiseacha, suíomhanna geografacha agus am a chur i gcomparáid bac ar mheasúnú ualach na dtubaistí ó leibhéil dhomhanda go leibhéil áitiúla.

Chun na dúshláin sin a shárú, bunaíodh leis an gclár Taighde Comhtháite ar Riosca Tubaistí (IRDR) tionscadal maidir le sonraí faoi chaillteanas de dheasca tubaistí (DATA) chun “saincheisteanna staidéir a bhaineann le sonraí faoi chaillteanas de dheasca tubaistí a bhailiú, a stóráil agus a scaipeadh” (IRDR 2013, 10). Táirge a tháinig le déanaí ó Mheitheal Tionscadail DATA (IRDR 2014) is ea téarmaíocht chaighdeánach ghuaise chomh maith le haicmiú priacail lena úsáid go hoibríochtúil i mbunachair sonraí maidir le caillteanais, rud ar chomhaontaigh comhaltaí uile na Meithle air. Dhírigh sé go heisiach ar phriacail gan plé a dhéanamh ar thomhas na gcaillteanas gaolmhar amhail tionchair dhaonna nó airgeadaíochta.

Tá doiciméadacht agus tomhas na dtionchar daonna agus eacnamaíoch an-athraitheach ar fud na mbunachar sonraí maidir le caillteanas de dheasca tubaistí. Tá sainmhínithe neamhréireacha ann chomh maith le tacair éagsúla táscairí a úsáidtear. Soláthraíonn an doiciméad seo, bunaithe ar dhá pháipéar oibre roimhe seo ón Lárionad Taighde ar Eipidéimeolaíocht Tubaistí (CRED) (CRED 2011, 2012) i gcomhar le München Re agus Swiss Re treoir maidir le tacar íosta táscairí caillteanais dhaonna agus eacnamaíocha agus a sainmhínithe ar cheart a bheith mar chuid d’aon bhunachar sonraí oibríochtúil maidir le caillteanas tubaistí. Tugtar liosta mianaidhme sa doiciméad freisin de tháscairí tionchair ar cheart faireachán a dhéanamh orthu mar chuid de bhunachair sonraí maidir le caillteanas de dheasca tubaistí amach anseo.