An Institiúid Eorpach um Fhoraoisí

Is eagraíocht idirnáisiúnta í an Institiúid Eorpach um Fhoraoisí (EFI) a bhunaigh Stáit Eorpacha. Faoi earrach 2011, bhí an Coinbhinsiún maidir le EFI daingnithe ag 23 Stát Eorpacha san iomlán, eadhon an Ostair, an Bhulgáir, an Chróit, Poblacht na Seice, an Danmhairg, an Fhionlainn, an Ghearmáin, an Ghréig, Éire, an Iodáil, an Laitvia, Lucsamburg, an Ísiltír, an Iorua, an Pholainn, an Phortaingéil, an Rómáin, an tSlóivéin, an Spáinn, an tSualainn, an Eilvéis, an Tuirc agus an Ríocht Aontaithe. Lena thart ar 120 eagraíocht Comhalta Comhlach agus Cleamhnaithe, cúig Oifig Réigiúnacha agus Ionad Tionscadail amháin, cuireann sé na teagmhálacha taighde foraoise is fearr ar fáil agus aithníonn sé comhoibriú ar leibhéal na hEorpa. Tá ceanncheathrú na hInstitiúide i Joensuu, an Fhionlainn. Déanann an EFI taighde agus cuireann sé comhairle beartais ar fáil maidir le saincheisteanna a bhaineann le foraoisí. Ina theannta sin, déanann sé líonrú a bhaineann le foraoisí a éascú agus a spreagadh chomh maith le soláthar faisnéise neamhchlaonta agus beartas-ábhartha maidir le foraoisí agus foraoiseacht a chur chun cinn. Tacaíonn sé freisin le taighde ar fhoraoisí agus le faisnéis atá fónta ó thaobh na heolaíochta de mar bhonn do cheapadh beartas maidir le foraoisí. Áirítear le hobair EFI i réimse na comhairle beartais tacaíocht fheabhsaithe do chinnteoirí agus do lucht ceaptha beartas. Tá ról láidir comhairle beartais aige trí Shaoráid FLEGT an Aontais a óstáil, saoráid a thacaíonn le próiseas an Aontais i ndáil le Forghníomhú an Dlí, Rialachas agus Trádáil i dtaca le Foraoisí (FLEGT) i dtíortha i mbéal forbartha, a bhaineann le cur chun feidhme Phlean Gníomhaíochta FLEGT an Aontais. Cabhraíonn Saoráid FLEGT an Aontais leis an gCoimisiún Eorpach agus le Ballstáit an Aontais ina n-iarrachtaí comhpháirteacha chun í a chur chun feidhme.