Saotharlann Nuálaíochta Dhomhanda um Maoiniú don Aeráid

Leis an tSaotharlann Nuálaíochta Domhanda um Maoiniú don Aeráid, déantar an próiseas sin a spreagadh trí leas a bhaint as taithí agus saineolas ó gach cearn den domhan chun an chéad ghlúin eile d’ionstraimí maoinithe don troid i gcoinne an athraithe aeráide a shainaithint, a dhearadh agus a phíolótú. Leis na hionstraimí sin, cuirtear réitigh nithiúla ar fáil ar dhúshláin mhaoiniúcháin atá le sárú i bhfíorthionscadail, agus is féidir margaí nua a thógáil, infheisteoirí nua a mhealladh, agus cuidiú chun na billiúin dollar a scaoileadh in infheistíocht nua atá neamhdhíobhálach don aeráid i dtíortha i mbéal forbartha.

Tá an tSaotharlann mar chuid d’iarrachtaí níos leithne ón rialtas agus ón earnáil phríobháideach chun maoiniú don troid i gcoinne an athraithe aeráide a mhéadú. Is é is aidhm dó freagairt do phráinn an dúshláin aeráide trí dhlús a chur le tograí a bhfuil gealladh fúthu maidir le maoiniú don aeráid ionas go mbeidh siad réidh lena gcur chun feidhme. Trí réitigh atá réidh don tionscadal a fhorbairt go tapa, réitigh is féidir a chur chun feidhme sa ghearrthéarma, tá sé d’aidhm aige na próisis atá ann cheana a chomhlánú.

Cuimsíonn an tSaotharlann ceannairí ó rialtais, cistí pinsin, bainc infheistíochta, forbróirí tionscadail agus institiúidí airgeadais forbartha. Is éard atá sna comhaltaí atá i láthair grúpa beag sinsearach de lucht ceaptha beartas, saineolaithe airgeadais, cleachtóirí agus forbróirí tionscadail. Lorgaíonn an tSaotharlann comhairle freisin ó níos faide ná a ballraíocht chun a chinntiú go bhfuil anailís láidir, chun tuilleadh fios gnó anailíseach, teicniúil, tráchtála agus polaitiúil a fhoinsiú, agus chun an tacaíocht is gá a thógáil chun treoirthionscadail a sheoladh.

D’fhorbair an Ríocht Aontaithe, na Stáit Aontaithe agus an Ghearmáin an tSaotharlann in 2014 i gcomhpháirtíocht le roinnt rialtais deontóra um maoiniú don aeráid (an Danmhairg, an Fhrainc, an tSeapáin, an Ísiltír, an Iorua) agus príomhghníomhaithe san earnáil phríobháideach.