An Clár Oibre Idir-Rialtasach maidir le Seirbhísí Bithéagsúlachta agus Éiceachórais (IPBES)

Bunaíodh IPBES i mí Aibreáin 2012, mar chomhlacht idir-rialtasach neamhspleách atá oscailte do bhalltíortha uile na Náisiún Aontaithe. Tá na baill tiomanta do IPBES a thógáil mar an príomhchomhlacht idir-rialtasach chun measúnú a dhéanamh ar staid bhithéagsúlacht an phláinéid, a éiceachórais agus na seirbhísí riachtanacha a sholáthraíonn siad don tsochaí.

Soláthraíonn
IPBES meicníocht atá aitheanta ag na pobail eolaíochta agus beartais araon chun faisnéis agus eolas ábhartha a ghineann rialtais, lucht acadúil, eagraíochtaí eolaíochta, eagraíochtaí neamhrialtasacha agus pobail dhúchasacha ar fud an domhain a shintéisiú, a athbhreithniú, a mheasúnú agus a mheas go criticiúil. Is éard atá i gceist leis sin grúpa inchreidte saineolaithe agus measúnuithe á ndéanamh acu ar an bhfaisnéis agus ar an eolas sin ar bhealach trédhearcach. Tá IPBES uathúil sa mhéid is go mbeidh sé d’aidhm aige an cumas a neartú chun úsáid éifeachtach a bhaint as an eolaíocht sa chinnteoireacht ar gach leibhéal. Beidh sé mar aidhm ag IPBES freisin aghaidh a thabhairt ar riachtanais Comhaontuithe Iltaobhacha Comhshaoil a bhaineann le seirbhísí bithéagsúlachta agus éiceachórais, agus tógáil ar phróisis atá ann cheana lena n-áiritheofar sineirgíocht agus comhlántachtaí in obair a chéile.

Le measúnuithe
IPBES, féachtar ar phríomhphróisis, lena n-áirítear an t-athrú aeráide, truailliú nó caillteanas agus díghrádú gnáthóg nádúrtha agus a dtionchar ar an mbithéagsúlacht ar scálaí réigiúnacha agus domhanda. Is é is aidhm dóibh freisin measúnú a dhéanamh ar na tairbhí a bhaineann leis an mbithéagsúlacht agus le seirbhísí agus feidhmeanna éiceachórais do dhaoine agus do cháilíocht na beatha chomh maith le leochaileacht i leith teagmhais fhoircneacha amhail iad siúd arb é an t-athrú aeráide is cúis leo a laghdú.