An tAontas Idirnáisiúnta um Chaomhnú an Dúlra (IUCN)

Is aontas ballraíochta é IUCN atá comhdhéanta d’eagraíochtaí rialtais agus d’eagraíochtaí na sochaí sibhialta araon. Baineann sé leas as taithí, acmhainní agus clúdach a níos mó ná 1,400 ball-eagraíocht agus ionchur níos mó ná 17,000 saineolaí. Mar gheall ar an éagsúlacht agus an saineolas ollmhór seo is é IUCN an t-údarás domhanda maidir le stádas an domhain nádúrtha agus na bearta is gá chun é a chosaint.

Oibríonn IUCN thar réimse leathan téamaí a bhaineann le cúrsaí caomhnaithe, comhshaoil agus éiceolaíochta. Maidir leis an athrú aeráide, déanann IUCN measúnú ar thionchar an athraithe aeráide ar speicis agus ar éiceachórais. Trína chuid oibre maidir le maolú bunaithe ar éiceachórais, oiriúnú agus laghdú rioscaí tubaiste, leagann sé béim freisin ar an ról tábhachtach atá ag réitigh dhúlrabhunaithe ar an athrú aeráide. Oibríonn sé freisin chun a chinntiú go bhfreagraíonn beartas agus gníomhaíocht aeráide do chúrsaí inscne, go bhfuil siad cuimsitheach go sóisialta agus go gcuirtear san áireamh leo riachtanais na ndaoine is leochailí.

Is téama trasearnála é an t-athrú aeráide a shíneann thar iliomad clár domhanda agus réigiúnach IUCN agus coimisiúin IUCN. I measc choimisiúin IUCN, cuireann an Coimisiún um Bainistíocht Éiceachóras (CEM) cineálacha cur chuige bunaithe ar éiceachórais chun cinn chun tírdhreacha agus muirdhreacha a bhainistiú, soláthraíonn sé treoir agus tacaíocht do bhainistíocht bunaithe ar éiceachórais agus cuireann sé córais shoch-éiceolaíocha athléimneacha chun cinn chun aghaidh a thabhairt ar dhúshláin dhomhanda. Laistigh de CEM, tugann an Grúpa Téamach um Oiriúnú agus Maolú Éiceachórais aghaidh ar dhúshláin oiriúnaithe agus ar chláir oiriúnaithe idirnáisiúnta agus náisiúnta.