Gníomhartha tarmligthe maidir le hathchóiriú CBT — míniú ar na príomhghnéithe

Ag deireadh mhí na Nollag 2013, foilsíodh na Bunrialacháin don Chomhbheartas Talmhaíochta (CBT) athchóirithe san Iris Oifigiúil, tar éis do Pharlaimint na hEorpa (PE) agus don Chomhairle iad a ghlacadh.

A mhéid a bhaineann le cur chun feidhme an athchóirithe, d’oibrigh an Coimisiún le saineolaithe ó na Ballstáit agus ó Pharlaimint na hEorpa le míonna beaga anuas chun na Gníomhartha Tarmligthe a ullmhú, agus inniu ghlac sé 10 nGníomh Tarmligthe ina sonraítear rialacha lena bhforlíontar agus lena leasaítear na Bunrialacháin (féach IP/14/231). Ina theannta sin, tá an Coimisiún, le cúnamh ó na Coistí ábhartha le saineolaithe na mBallstát, i mbun na Gníomhartha Cur Chun Feidhme a thabhairt chun críche. 

Déantar achoimre sa doiciméad seo ar na príomhghnéithe a chumhdaítear leis na Gníomhartha Tarmligthe éagsúla, is iad sin i) na hÍocaíochtaí Díreacha, ii) Comheagrú na Margaí (CEM), iii) an Fhorbairt Tuaithe agus, iv) an Rialachán Cothrománach maidir le CBT a mhaoiniú, a bhainistiú agus faireachán a dhéanamh air.