EMODNET, Líonra Breathnóireachta agus Sonraí Muirí na hEorpa

Is tionscnamh sonraí muirí fadtéarmach é an Líonra Breathnóireachta agus Sonraí Muirí Eorpach (EMODnet) ó Ard-Stiúrthóireacht Gnóthaí Muirí agus Iascaigh an Choimisiúin Eorpaigh (AS MARE) atá mar bhonn agus mar thaca ag a straitéis Eolas Muirí 2020. Is éard atá in EMODnet cuibhreannas eagraíochtaí a thiomsaíonn sonraí, táirgí sonraí agus meiteashonraí muirí Eorpacha ó fhoinsí éagsúla ar bhealach aonfhoirmeach. Is é príomhchuspóir EMODnet acmhainní sonraí muirí ilroinnte agus folaithe a scaoileadh agus iad a chur ar fáil do dhaoine aonair agus d’eagraíochtaí (poiblí agus príobháideach), agus infheistíocht i ngníomhaíochtaí inbhuanaithe cósta agus amach ón gcósta a éascú trí rochtain níos fearr ar shonraí muirí ardcháilíochta, caighdeánaithe agus comhchuibhithe atá idir-inoibritheach agus saor ó shrianta ar úsáid.

Forbraítear bonneagar sonraí EMODnet trí chur chuige céim ar chéim i dtrí mhórchéim. Faoi láthair tá EMODnet sa dara céim forbartha (2013-2016) agus tá seacht bhfothairseach i bhfeidhm a sholáthraíonn rochtain ar shonraí muirí ó na téamaí seo a leanas: bataiméadracht, geolaíocht, fisic, ceimic, bitheolaíocht, gnáthóga ghrinneall na farraige agus gníomhaíochtaí an duine. Is próiseas dinimiciúil é forbairt EMODnet ionas go gcuirtear sonraí, táirgí agus feidhmiúlacht nua leis go rialta agus go bhfeabhsaítear tairseacha go leanúnach chun an tseirbhís a dhéanamh níos oiriúnaí don fheidhm agus níos cairdiúla don úsáideoir le cabhair ó úsáideoirí agus páirtithe leasmhara.