Pleanáil don Chomhshaol agus Ríomheolas Acmhainní i gCathracha agus Bailte na hEorpa (PERFECT)

Léireoidh tionscadal PERFECT conas is féidir le húsáidí iomadúla an bhonneagair ghlais (GI) tairbhí sóisialta, eacnamaíocha agus comhshaoil a sholáthar; agus músclóidh sé feasacht ar an acmhainneacht sin, chun tionchar a imirt ar an bpróiseas ceaptha beartas agus chun infheistíocht níos mó sa bhonneagar glas a spreagadh.

Laistigh den tionscadal, meastar go bhfuil oiriúnú don athrú aeráide ar cheann de na príomhthairbhí a bhaineann le TG i gceantair uirbeacha agus gur dlúthchuid de chur chuige iltairbhe TG é. Tá sé d’aidhm ag PERFECT an méid seo a leanas a dhéanamh:

• feasacht a scaipeadh maidir le luach an bhonneagair ghlais don chlár oibre post agus fáis i measc pobal níos leithne;
• dea-chleachtas inaistrithe a shainaithint;
• feabhas a chur ar infheistíocht agus ar mhaoirseacht trí pháirt a thabhairt d’údaráis bhainistíochta agus trí acmhainneacht ghairmiúil na bpríomhpháirtithe leasmhara a mhéadú maidir le tionscadail nua a chur i gcrích;
• cuidiú le háiteanna a dhéanamh níos inmharthana ó thaobh an gheilleagair, na sochaí agus an chomhshaoil de trí phleananna gníomhaíochta a fhorbairt chun leas a bhaint as na tairbhí iomadúla a bhaineann le hinfheistíocht straitéiseach i mbonneagar glas.

 

Oibreoidh tionscadal PERFECT chun na tairbhí iomadúla a bhaineann le hinfheistíocht i mbonneagar glas a shainaithint trí Chláir Oibríochtúla Chistí Struchtúracha an Aontais agus trí ionstraimí beartais eile, chun cuidiú le cuir chuige iomlánaíocha agus chomhtháite a cheapadh maidir le cosaint agus forbairt na hoidhreachta nádúrtha.

Is iad seo a leanas príomhthorthaí an tionscadail:

• seacht bplean gníomhaíochta le haghaidh bonneagar glas nua feabhsaithe lena mbainfear an leas is mó is féidir as na tairbhí iomadúla a bhaineann leis;
• sainpháipéir agus bileoga eolais;
• treoir maidir le hoibriú comhpháirtíochta bonneagair ghlais; agus
• maitrís dea-chleachtais MAGIC (Ilbhuntáistí an Bhonneagair Ghlais i gCathracha).