Oiriúnú, Maolú agus Forbairt Inbhuanaithe do Chathracha a Réiteach (RAMSES)

Ba é príomhaidhm an tionscadail taighde seo fianaise chainníochtúil a sholáthar ar thionchair an athraithe aeráide agus ar na costais agus na tairbhí a bhaineann le raon leathan beart oiriúnaithe, ag díriú ar cheantair uirbeacha. Chuaigh RAMSES i dteagmháil le páirtithe leasmhara chun ábharthacht bheartais an eolais a bailíodh a chothú, agus chun dearadh agus cur chun feidhme straitéisí oiriúnúcháin san Aontas agus níos faide i gcéin a éascú. Sainaithníodh saintréithe na gcathracha agus a n-idirnaisc agus úsáideadh iad chun an comhthéacs áitiúil a sholáthar don mheasúnú, i gcur chuige comhtháite ón mbarr anuas agus ón mbun aníos arb é is aidhm dó rioscaí, leochaileachtaí agus damáistí mar gheall ar an athrú aeráide a chainníochtú. Rinneadh meastachán ar chostais agus tairbhí gaolmhara an oiriúnaithe chun tacú le straitéisí aistrithe inbhuanaithe a dhearadh i limistéir uirbeacha. Chuir RAMSES bonn fianaise ar fáil a bhí úsáideach chun costais oiriúnaithe a laghdú agus chun tuiscint níos fearr ar bhearta oiriúnaithe i gcathracha agus glacadh níos fearr leo a chumasú.

Chomh maith leis an rannchuidiú eolaíoch, scrúdaíodh an comhthéacs polaitiúil agus institiúideach i gcathracha cás-staidéir, rud a d’fhág go rabhthas in ann sásraí a shainaithint lena múnlaítear ceapadh beartais nithiúil. Shoiléirigh sé sin nach mór aistriú ó bhreithnithe fíortheicniúla agus/nó simplí costais is tairbhe a bheith ann, agus go n-éilíonn páirtithe leasmhara cathrach punann roghanna seachas conair optamach amháin, agus gur gné bhunúsach é cumhachtú daoine chun glacadh le bearta oiriúnaithe don athrú aeráide a mhéadú.

I measc phríomhthorthaí RAMSES bhí:

• Frámú straitéiseach le haghaidh cinnteoireacht oiriúnaithe atá bunaithe ar fhianaise.
• Anailís il-leibhéil lena gcomhtháthaítear cur chuige traidisiúnta áitiúil na gcathracha maidir le straitéisí oiriúnúcháin i gcreat cuimsitheach ón mbun aníos/ón mbarr anuas inar breithníodh costais ar an leibhéal náisiúnta, ar leibhéal an Aontais agus ar an leibhéal idirnáisiúnta.
• Creat chun measúnú a dhéanamh ar chostais eacnamaíocha agus ar thairbhí an oiriúnaithe, agus modheolaíochtaí forbartha chun breithniú a dhéanamh ar chostais dhíreacha agus indíreacha araon a bhaineann le tionchair a bhaineann leis an aeráid.
• Cás-staidéir chathrach agus gníomhaíochtaí rannpháirtíochta páirtithe leasmhara lenar cuireadh i dtábhacht ábharthacht an chreata do lucht ceaptha beartas agus inghlacthacht mhéadaithe na mbeart oiriúnaithe do pháirtithe leasmhara eile.
• Bosca uirlisí soláimhsithe do pháirtithe leasmhara cathrach a bhíonn ag déileáil le cinntí oiriúnaithe agus maolaithe. Is éard atá ann Lámhleabhar Aistrithe (treoir céim ar chéim), ábhair oiliúna, agus feidhmchlár treorach closamhairc gréasánbhunaithe.