2021 EDS Health and Climate Change Global Survey Report [Tuarascáil Shuirbhé Dhomhanda 2021 EDS maidir le Sláinte agus an tAthrú Aeráide]

I dtuarascáil suirbhé domhanda 2021 EDS maidir le sláinte agus an t-athrú aeráide, tugtar léargas luachmhar ar an dul chun cinn foriomlán atá déanta ag rialtais maidir le haghaidh a thabhairt ar na rioscaí sláinte a bhaineann leis an athrú aeráide. Is é is aidhm do na torthaí maidir le príomhtháscairí sláinte agus athraithe aeráide lucht ceaptha beartas a chumhachtú chun an méid seo a leanas a dhéanamh: cinntí eolasacha a dhéanamh maidir le cur chun feidhme beartas agus pleananna; bearnaí fianaise a shainaithint; agus tuiscint níos fearr a fháil ar na bacainní ar thosaíochtaí oiriúnaithe agus athléimneachta a bhaint amach in earnáil na sláinte agus, ag an am céanna, na tairbhí sláinte a bhaineann le hiarrachtaí maolaithe aeráide ar fud na hearnála a uasmhéadú.

Tá an fhreagairt sláinte ar an athrú aeráide ag tarlú i gcomhthéacs phaindéim leanúnach COVID-19, dhíghrádú leanúnach an chomhshaoil agus chailliúint na bithéagsúlachta, neamhionannais shocheacnamaíocha, agus tearcinfheistíocht ainsealach i gcórais sláinte. Féachann an tuarascáil seo, nuair is féidir, le torthaí a sholáthar maidir leis na dúshláin idirghaolmhara sin.

Tá tuarascáil an tsuirbhé dhomhanda bunaithe ar shuirbhé tríbhliantúil deonach a sheoltar chuig gach ceann de 194 Bhallstát EDS agus chuig líon beag Críoch nach Ballstáit iad. Críochnaíonn aireachtaí sláinte é i gcomhairle le páirtithe leasmhara sláinte, aireachtaí agus institiúidí eile. Tá méadú suntasach tagtha ar rannpháirtíocht sa suirbhé thar na blianta. In 2015, thug 40 tír freagra ar an suirbhé. D’fhás sé sin go 101 fhreagróir tíre in 2018. D’ainneoin phaindéim COVID-19 agus a héilimh ar aireachtaí sláinte, bhí an rannpháirtíocht fós ard sa tríú timthriall seo, agus 95 fhreagróir tíre ann. 

 I dtuarascáil suirbhé dhomhanda 2021, tugtar nuashonrú ar shuirbhé 2017/2018, agus foilsíodh í ag comhdháil aeráide COP26 na Náisiún Aontaithe i mí na Samhna 2021.