Pláinéad Glan do Chách

I mí na Samhna 2018, seoladh straitéis fhadtéarmach nua an Aontais maidir le laghdú GCT ‘Pláinéad Glan do Chách’, arb é is aidhm di geilleagar agus sochaí an Aontais a stiúradh i dtreo todhchaí saor ó astaíochtaí CO2 do 2050. Leis an straitéis, cuireadh ocht gconair mhalartacha chun cinn ar féidir leis an Eoraip a bheith ar thús cadhnaíochta i dtreo na haeráidneodrachta. Go háirithe, déantar iniúchadh i ngach ceann de na chéad chúig cinn ar rogha theicneolaíoch dhifriúil: meascán fuinnimh arb iad foinsí in-athnuaite fuinnimh, bonneagair ghréasáin chliste agus nua-aimseartha is mó atá ann, borradh a chur faoin éifeachtúlacht fuinnimh, earnáil iompair atá leictrithe go forleathan, teicneolaíochtaí atá níos neodraí ó thaobh carbóin de agus níos mó ciorclaíochta san earnáil thionsclaíoch. Áirítear sa séú ceann na roghanna thuasluaite uile agus ceadaítear laghdú 90 % ar astaíochtaí CO2, mar gheall ar astaíochtaí gás ceaptha teasa iarmharacha dosheachanta ó earnáil na talmhaíochta. Chun dícharbónú iomlán agus comhoiriúnacht le sprioc mhéadaithe meánteochta domhanda 1.5 °C a bhaint amach, áirítear sa 7ú agus san 8ú cás bearta chun astaíochtaí diúltacha a bhaint amach trí GSC a chomhcheangal le bithfhuinneamh agus linnte talmhaíochta agus foraoiseachta, agus trí chiorclaíocht an gheilleagair ina iomláine agus rannpháirtíocht ghníomhach shaoránaigh an Aontais a fheabhsú a thuilleadh. Scrúdaítear sa straitéis freisin na bearta beartais lenar féidir an sprioc sin a bhaint amach. Cuireann an ‘creat cumasúcháin’ le Straitéis an Aontais Fuinnimh agus leagtar béim ann ar an ról atá ag maoiniú inbhuanaithe, beartais nuálaíochta, gníomhaíochtaí áitiúla agus cumhachtú shaoránaigh an Aontais, spriocanna aeráide agus comhshaoil a chuíchóiriú sa bheartas iomaíochta, agus, ar deireadh, ar an tábhacht a bhaineann le bonneagair a dhíonadh ar an aeráid ó thaobh eangacha fuinnimh a chur in oiriúint do riachtanais a bheidh ann amach anseo faoi aeráid atá ag athrú.