Straitéis Foraoise nua de chuid an Aontais: d’fhoraoisí agus don earnáil foraoisbhunaithe

Clúdaíonn foraoisí agus coillearnach eile os cionn 40 % de limistéar talún an Aontais, le héagsúlacht mhór carachtar ar fud na réigiún. Ar fud an domhain, áfach, tá an limistéar foraoise ag laghdú i gcónaí. Tá foraoisí ilfheidhmeach, agus freastalaíonn siad ar chuspóirí eacnamaíocha, sóisialta agus comhshaoil. Cuireann siad gnáthóga ar fáil d’ainmhithe agus do phlandaí agus tá ról mór acu maidir leis an athrú aeráide agus seirbhísí comhshaoil eile a mhaolú. Chun feidhmeanna na bhforaoisí sin a chaomhnú, ghlac an Coimisiún Eorpach Straitéis nua Foraoise AE an 20 Meán Fómhair 2013 a fhreagraíonn do na dúshláin nua atá roimh fhoraoisí agus roimh earnáil na foraoiseachta. Leis an Straitéis nua, tugtar creat nua mar fhreagairt ar na héilimh mhéadaitheacha a chuirtear ar fhoraoisí agus ar athruithe suntasacha sochaíocha agus polaitiúla a bhfuil tionchar acu ar fhoraoisí le 15 bliana anuas. Sainaithnítear sa straitéis nua na príomhphrionsabail is gá chun bainistiú inbhuanaithe foraoisí a neartú agus chun feabhas a chur ar iomaíochas agus ar chruthú post, go háirithe i gceantair thuaithe, agus cosaint foraoisí agus soláthar seirbhísí éiceachórais á n-áirithiú ag an am céanna. Sonraítear ann freisin an chaoi ar mian leis an Aontas beartais a bhaineann le foraoisí a chur chun feidhme.