Oiriúnú d’éifeachtaí an athraithe aeráide ar an tsláinte san Eoraip

Is iad na príomhthionchair ar an tsláinte san Eoraip teas agus tonnta teasa, patrúin athraitheacha galar tógálach agus veicteoir-iompartha, agus tubaistí foircneacha amhail tuilte agus dóiteáin. Cuirtear i láthair sa tuairim seo na dúshláin atá roimh earnáil na sláinte mar gheall ar an ngá atá le hoiriúnú do na rioscaí méadaithe a bhaineann leis an athrú aeráide, agus cuirtear moltaí ar fáil inti arb é is aidhm dóibh athléimneacht earnáil na sláinte san Eoraip a neartú i bhfianaise thionchair an athraithe aeráide. 

Tá iarmhairtí diúltacha iomadúla ag an athrú aeráide cheana féin don tsláinte, rud a rachaidh in olcas leis na harduithe dosheachanta sa teocht. Mar shampla, d’fhéadfadh básanna bliantúla ó theas foircneach ardú ó 2,700 bás in aghaidh na bliana inniu go dtí thart ar 30,000-50,000 faoi 2050 le téamh domhanda 1.5 °C agus 2 °C, faoi seach, ag glacadh leis go bhfuil leochaileacht teasa ann agus gan bearta oiriúnaithe breise. Dá bhrí sin, ní mór an tsláinte a chomhtháthú go daingean san oiriúnú don athrú aeráide.

Sa bheartas sláinte poiblí, tá inniúlachtaí tacaíochta den chuid is mó ag an Aontas, cé go bhfuil sainordú níos láidre aige i gcás bagairtí tromchúiseacha trasteorann ar an tsláinte. Trí obair an Lárionaid Eorpaigh um Ghalair a Chosc agus a Rialú (ECDC) agus na Seirbhíse Copernicus um an Athrú Aeráide (C3S), rinneadh roinnt dul chun cinn maidir le bagairtí a eascraíonn as an aeráid (amhail galair thógálacha atá íogair ó thaobh na haeráide de nó teagmhais adhaimsire) a chomhtháthú i gcóras coiteann an Aontais maidir le faireachas eipidéimeolaíoch, faireachán, luathrabhadh, ullmhacht agus pleanáil freagartha.

Agus leas á bhaint as sintéis fianaise eolaíche lena n-áirítear comhairliúchán le saineolaithe, is é is aidhm don tuairim eolaíoch neamhspleách seo bonn eolais a chur faoi Straitéis Oiriúnaithe nua an Aontais agus faoi bheartais sláinte an Aontais le moltaí arb é is aidhm dóibh rioscaí mar thoradh ar éifeachtaí sláinte a bhaineann leis an aeráid a theorannú.

Déantar trí phríomh-mholadh:

1. Sláinte an duine a chomhtháthú i ngach beartas oiriúnaithe don athrú aeráide ar fud na n-earnálacha agus na leibhéal rialachais uile.
2. Tacú le hacmhainneacht agus ullmhacht na hearnála sláinte mar chuid de straitéisí riosca tubaiste agus éigeandála níos leithne, lena n-áirítear faireachas, faireachán agus measúnú.
3. Beartais a dhearadh chun tacú leis na grúpaí sóisialta agus na limistéir gheografacha is leochailí.