Tuarascáil an Aontais maidir leis an nGeilleagar Gorm 2020

Sa tríú heagrán de Thuarascáil an Aontais maidir leis an nGeilleagar Gorm, leantar d’anailís a dhéanamh ar raon feidhme agus ar mhéid an Gheilleagair Ghoirm san Aontas Eorpach. Is é is aidhm dó tacaíocht a chur ar fáil do lucht déanta beartas agus do pháirtithe leasmhara agus iad ag iarraidh forbairt inbhuanaithe a dhéanamh ar na haigéin, ar acmhainní cósta agus, go háirithe, ar fhorbairt agus ar chur chun feidhme beartas agus tionscnamh faoin gComhaontú Glas don Eoraip i gcomhréir leis an gcur chuige nua maidir le Geilleagar Gorm inbhuanaithe.

Chun críocha na Tuarascála, áirítear leis an nGeilleagar Gorm na gníomhaíochtaí sin uile atá muirí-bhunaithe nó muirí-bhainteach. Dá bhrí sin, déantar scrúdú sa Tuarascáil ní hamháin ar earnálacha seanbhunaithe (i.e. iad siúd a chuireann go traidisiúnta leis an nGeilleagar Gorm) ach freisin ar earnálacha nuálacha atá ag teacht chun cinn (iad siúd a bhfuil sonraí iontaofa fós ag forbairt ina leith), ar earnálacha iad a thugann deiseanna nua infheistíochta agus a bhfuil acmhainneacht ollmhór acu d’fhorbairt pobal cósta amach anseo.

Tá sé beartaithe go mbeidh an Tuarascáil seo ina hionchur úsáideach chun measúnú a dhéanamh ar acmhainneacht na n-aigéan agus na gcóstaí maidir le haistriú chuig geilleagar níos inbhuanaithe agus chun tacú le forbairt beartas i gcomhréir leis an gcur chuige straitéiseach maidir le geilleagar gorm inbhuanaithe ar gach leibhéal rialachais.

Sa tríú heagrán seo, féachann an Tuarascáil le gnéithe nua a chur san áireamh, a bhfuil tionchar acu ar an nGeilleagar Gorm. Áirítear leis go sonrach dúshláin amhail an t-athrú aeráide, agus cumasóirí amhail an Phleanáil Spásúil Mhuirí. Go háirithe, i gcaibidil 3 déantar iniúchadh ar thionchair gníomhaíochtaí muirí i dtéarmaí astaíochtaí gás ceaptha teasa agus ról an aigéin maidir le haeráid an domhain a rialáil agus an t-athrú aeráide a mhaolú. Leanann an chaibidil ar aghaidh trí imscrúdú a dhéanamh ar thionchair an athraithe aeráide ar an aigéan, amhail a éifeacht ar earnáil an iascaigh agus an dobharshaothraithe agus an méadú ar thuilte a mbeidh cosaint agus oiriúnú cósta ag teastáil ina leith. Ar deireadh, déantar anailís freisin ar thionchar an truaillithe agus an bhruscair sna haigéin (lena n-áirítear plaistigh).