Oiriúnú don athrú aeráide i gcás mórthionscadal bonneagair

Rinne an staidéar seo athbhreithniú ar infhaighteacht ábhar acmhainní ar féidir leo tacú le forbróirí tionscadal bonneagair oiriúnú don athrú aeráide a mheas. Cuireann sé measúnú foriomlán ar fáil ar na hacmhainní atá ar fáil a chuireann le hullmhacht na mBallstát maidir le ceanglais athraithe aeráide chlárthréimhse Chistí Struchtúracha agus Infheistíochta na hEorpa 2014-2020. Ar deireadh, sainaithníonn sé roinnt dea-chleachtas maidir le hoiriúnú don athrú aeráide.

Bailíodh faisnéis le haghaidh chomhpháirt stocáirimh an staidéir trí thaighde deisce gréasánbhunaithe, chomh maith le ceistneoirí agus agallaimh a bhí dírithe ar údaráis inniúla náisiúnta ábhartha (údaráis bhainistíochta, institiúidí taighde, oifigigh aireachta, etc.). Rinneadh athbhreithniú ar an leibhéal Eorpach agus ar leibhéal na mBallstát araon. Déantar idirdhealú sa staidéar idir seacht gcatagóir acmhainní:

• Infhaighteacht sonraí; infhaighteacht, inrochtaineacht agus infheidhmeacht sonraí maidir le réamh-mheastacháin agus tionchair aeráide, paraiméadair gheoifisiceacha, cásanna fadtéarmacha, tionchair eacnamaíocha, chomhshaoil agus shóisialta, etc.
• Modheolaíochtaí; modheolaíochtaí cainníochtúla nó cáilíochtúla (córas próiseas, sraith prionsabal agus rialacha) chun oiriúnú don athrú aeráide a chomhtháthú i bhforbairt tionscadal bonneagair.
• Uirlisí le haghaidh pleanála, meastóireachta, meastachán tionchair (i.e. bogearraí, léarscáileanna, ionsamhlúcháin ríomhaireachta, léirshamhlú fadtéarmach réamhaisnéise aeráide etc.) chun cabhrú le bonneagar a oiriúnú do thionchair aeráide.
• Treoir maidir le conas modheolaíochtaí a úsáid (i.e. chun measúnuithe riosca agus leochaileachta i leith an athraithe aeráide a dhéanamh) nó an doiciméadacht tionscadail bonneagair is gá a bhaineann le hoiriúnú don athrú aeráide a fhorbairt.
• Caighdeáin deartha; infhaighteacht caighdeán foilsithe maidir le dearadh innealtóireachta (i.e. caighdeáin BSI, DIN, ISO) le haghaidh tionscadail bhonneagair lena n-áirítear ranna nó forálacha iomchuí chun athléimneacht in aghaidh thionchair an athraithe aeráide a áirithiú.
• Córas agus creat dlíthiúil; an creat institiúideach agus dlíthiúil arna ghlacadh ag údaráis fhoirmiúla ar fud an Aontais a úsáidtear chun freagrachtaí a chur ar fáil maidir le hoiriúnú don athrú aeráide, bonneagar agus bainistiú Chistí Struchtúracha agus Infheistíochta na hEorpa.
• Acmhainneacht institiúideach; cumas daonna agus teicniúil na n-institiúidí chun a bhfeidhmeanna maidir le hoiriúnú don athrú aeráide a chur i gcrích.

Rinneadh athbhreithniú sa staidéar sin ar ullmhacht maidir le hinfhaighteacht acmhainní earnáilsonracha le haghaidh sé earnáil éagsúla den gheilleagar (gabhdóirí): iompar, leathanbhanda, forbairt uirbeach, fuinneamh, uisce agus dramhaíl.

Bhailigh an staidéar cás-staidéir dhea-chleachtais freisin a sholáthraíonn samplaí d’oiriúnú don athrú aeráide agus athléimneacht i leith an athraithe aeráide a chomhtháthú i dtionscadail bhonneagair. Léiríonn na cás-staidéir éagsúlacht Ballstát, suíomhanna geografacha agus earnálacha agus cuirtear i láthair iad ar bhealach caighdeánaithe ionas gur féidir príomhtheachtaireachtaí a scaipeadh go héasca.