Cleachtas oiriúnaithe don athrú aeráide ar fud an Aontais

Is gealltanas dúshlánach é an t-oiriúnú nach bhfuil ach ag tosú ar fud an Aontais. Is é is aidhm don fhoilseachán seo samplaí léiritheacha de ghníomhaíochtaí oiriúnaithe a chur ar fáil do lucht déanta beartas, d’fhorbróirí tionscadail agus do ghníomhaithe eile ar an leibhéal náisiúnta, réigiúnach agus áitiúil. Eascraíonn na samplaí agus na cás-staidéir a chuirtear i láthair anseo as taighde ar oiriúnú don athrú aeráide ar an leibhéal réigiúnach i mBallstáit uile an Aontais. Tá torthaí an taighde le fáil sa Staidéar ar Ghníomhaíochtaí Oiriúnaithe ar an Leibhéal Réigiúnach san AE, a ullmhaíodh d'Ard-Stiúrthóireacht um Ghníomhú ar son na hAeráide an Choimisiúin Eorpaigh in 2013. Mar chuid den taighde sin, sainaithníodh liosta fada de shamplaí cleachtais, ó gach cearn den Aontas. Cumhdaíonn na samplaí sin raon cleachtas oiriúnúcháin: iarrachtaí chun tuiscint níos fearr a fháil ar thionchair an athraithe aeráide; pleanáil le haghaidh oiriúnú ar gach leibhéal; agus réitigh oiriúnaithe nithiúla a chur chun feidhme. Baineadh úsáid as na samplaí sin agus as samplaí eile ón litríocht agus as bunachar sonraí méadaitheach na gcásanna ar an Ardán Eorpach um Oiriúnú don Athrú Aeráide (Climate-ADAPT) chun a bhfuil á dhéanamh faoin athrú aeráide i bpríomhearnálacha beartais a léiriú; Roghnaíodh deich sampla mar ábhar na gcás-staidéar níos faide.

Cuirtear an foilseachán seo i láthair ina dhá chuid. Sa chéad chuid tá forléargas gearr ar thionchair an athraithe aeráide ar phríomhearnálacha beartais: Talmhaíocht agus foraoiseacht; Bithéagsúlacht; Limistéir chósta; Rioscaí tubaiste a laghdú; Sláinte; Bainistíocht bonneagair agus uisce. Léirítear tionchair de réir earnála chun tuiscint níos fearr a thabhairt ar cad is brí leis an athrú aeráide dár slí bheatha, agus do cheapadh beartas freisin. Cuirtear freagairtí oiriúnaithe a d’fhéadfadh a bheith ann do na príomhthionchair i láthair trí dhea-chleachtas atá ann cheana a léiriú.

Tá deich gcás-staidéar sa dara cuid a léiríonn an chaoi a ndéantar taighde, pleanáil agus seachadadh ar an oiriúnú don athrú aeráide ar fud an Aontais. Tá na deich gcás-staidéar éagsúil go leor ó thaobh ábhair de. Tugann siad aghaidh ar leibhéil éagsúla rialachais – ón leibhéal náisiúnta go dtí an leibhéal áitiúil chomh maith le saincheisteanna trasteorann laistigh de na Ballstáit agus ar fud na mBallstát araon. Clúdaíonn siad raon limistéar geografach agus aeráide san Aontas. Tugann siad aghaidh ar earnálacha leochaileacha éagsúla, amhail talmhaíocht, bainistiú uisce, turasóireacht agus limistéir chósta.