An t-athrú aeráide agus an t-iascach Eorpach: athruithe breathnaithe agus ionchais amach anseo

Leis na hathbhreithnithe a rinneadh le
déanaí ar an Atlantach Thuaidh, cuirtear fianaise láidir imthoisceach ar fáil a thugann le fios go mbeidh tionchar forleathan ag athruithe ar aeráid na n-aigéan ar dhinimic na bpobal éisc agus, dá bhrí sin, ar ionchais amach anseo maidir le hiascach agus dobharshaothrú san Eoraip. Mar sin féin, tá an t-eolas ar na sásraí foluiteacha sách teoranta. Ar an gcéad dul síos, tá éiginnteacht ann maidir le forbairt na haeráide aigéin féin amach anseo, ós rud é go mbeidh tionchar ag gnéithe éagsúla amhail patrúin chúrsaíochta, teochtaí aeir agus dhromchla na farraige, minicíocht agus déine stoirmeacha, patrúin frasaíochta, pH agus rith chun srutha abhann. Ar an dara dul síos, is iondúil go mbíonn saolréanna casta ag éisc agus sliogéisc ina bhfuil roinnt céimeanna de stair na beatha, agus iad éagsúil ó thaobh a n-íogaireachta d’éifeachtaí aeráide de.
Tá an bonn eolais maidir le hidirghníomhaíochtaí idir iascaigh agus an aeráid a thuiscint ag dul i méid, ach tá go leor dúshlán fós ann, go háirithe maidir le hiarmhairtí socheacnamaíocha amach anseo a thuar. Níl sé i gceist go mbeadh an páipéar seasaimh seo ina athbhreithniú eolaíoch uileghabhálach ar éifeacht an athraithe aeráide ar iascaigh, ach is é is aidhm dó aird a tharraingt ar chuid de na príomh-shaincheisteanna agus na bearnaí eolais, ar cheart d’institiúidí taighde iascaigh agus don Choimisiún Eorpach díriú orthu go luath amach anseo.