Tionchair a bhaineann leis an aeráid ar bhainistiú agus rialachas iascaigh san Atlantach Thoir Thuaidh

Is bagairt é an t-athrú aeráide atá ann faoi láthair agus atá ag dul i méid, rud a chruthaíonn athruithe suntasacha i raon, i ndáileadh agus i dtáirgiúlacht na bpríomhspeiceas tráchtála. I bhfianaise an tionchair atá ag an athrú aeráide ar dháileadh agus ar raon na stoc éisc i réigiún an Atlantaigh Thoir Thuaidh, agus i bhfianaise na ndúshlán gaolmhar bainistíochta agus rialachais a bhaineann leis na hathruithe sin, tá sé mar aidhm ag an gCiste um Chosaint an Chomhshaoil (EDF) na saincheisteanna lárnacha sin, agus réitigh fhéideartha orthu, a fhiosrú trí cheardlann chomhoibríoch dhá lá dar teideal: ‘Tionchair a bhaineann leis an aeráid ar Bhainistíocht agus Rialachas Iascaigh i Réigiún an Atlantaigh Thoir Thuaidh’. Reáchtáladh an cheardlann ar an 30 agus 31 Lúnasa 2017. Ba iad seo a leanas na príomhchuspóirí:

• Bonn coiteann a chur faoin taighde agus faoi na treochtaí is déanaí a bhaineann le hathruithe ar dháileadh stoc éisc agus ar tháirgiúlacht mar thoradh ar an athrú aeráide, agus na hathruithe sin a phlé de réir mar a bhaineann siad le réigiún an Atlantaigh Thoir Thuaidh;
• Scrúdú a dhéanamh ar ról na heolaíochta maidir le rioscaí agus tionchair a bhaineann leis an aeráid a shainaithint, agus measúnú a dhéanamh ar an gcomhéadan idir eolaíocht agus beartas atá ann faoi láthair;
• Breathnú ar na himpleachtaí a d’fhéadfadh a bheith ag tionchair a bhaineann leis an aeráid ar bhainistiú agus rialachas iascaigh san Eoraip agus i mór-réigiún an Atlantaigh Thoir Thuaidh anois agus amach anseo; agus
• Féachaint ar na huirlisí agus ar na cineálacha cur chuige a d’fhéadfadh a bheith ann lenar féidir iascaigh a bhainistiú ar an mbealach is fearr i bhfianaise na dtionchar sin.

Sonraíonn an tuarascáil plé agus torthaí na ceardlainne agus aithníonn sí téamaí uileghabhálacha, chomh maith leis na chéad chéimeanna eile a d’fhéadfadh a bheith ann chun taighde a chur chun cinn agus comhpháirtíochtaí a thógáil amach anseo.