Conclúidí ón gComhairle maidir le Straitéis an Aontais Eorpaigh um an Oiriúnú

An 18 Meitheamh 2013, ghlac an Chomhairle (Comhshaol) conclúidí i ndáil le straitéis de chuid an Aontais maidir le hoiriúnú don athrú aeráide. Leagann siad béim ar an ngá atá le gníomhaíocht mhéadaithe ar gach leibhéal agus ag na gníomhaithe ábhartha uile chun aghaidh a thabhairt ar an oiriúnú don athrú aeráide ar an mbealach is éifeachtaí agus ar a thábhachtaí atá sé an t-oiriúnú a phríomhshruthú i ngach beartas ábhartha ar gach leibhéal rialtais (Eorpach, náisiúnta, réigiúnach agus áitiúil), agus prionsabal na coimhdeachta á chur san áireamh. Iarrtar sna conclúidí ar an gCoimisiún leanúint d’oiriúnú don athrú aeráide a chur san áireamh i dtograí ábhartha le haghaidh ghníomhaíocht an Aontais agus d’éascú breise a dhéanamh ar an díonadh ar an athrú aeráide chomh maith le hinfheistíochtaí fadsaoil, i gcomhréir leis an eolas agus leis an gcleachtas is fearr atá ar fáil. Iarrann siad ar na Ballstáit uile leanúint dá mbeartais oiriúnaithe a fhorbairt, a chur chun feidhme agus a athbhreithniú i bhfianaise treoirlínte arna n-ullmhú ag an gCoimisiún Eorpach, lena dtugtar aghaidh ar shaincheisteanna amhail gnéithe trasteorann agus comhleanúnachas le pleananna náisiúnta bainistithe riosca tubaistí. Thairis sin, cuireann siad i bhfios go láidir go mbeidh rochtain fheabhsaithe ar chistiú ina toisc ríthábhachtach chun Eoraip aeráid-díonach a thógáil. Is díol sásaimh dóibh tiomantas an Choimisiúin agus na Gníomhaireachta Eorpaí Comhshaoil chun Climate-ADAPT a fhorbairt a thuilleadh mar ‘ionad ilfhreastail’ le haghaidh faisnéis maidir le hoiriúnú san Eoraip agus chun idirghníomhaíocht a fhorbairt idir Climate-ADAPT agus ardáin ábhartha eile, lena n-áirítear tairseacha oiriúnaithe náisiúnta agus áitiúla.