Is bagairt don Eoraip iad Pointí Iompaithe Chóras an Domhain

Agus an téamh domhanda ag druidim go tapa le 1.5 °C, tá na rioscaí forleathana sistéamacha a bhaineann le roinnt Pointí Iompaithe Chóras an Domhain (ESTPanna) a thrasnú ag teacht chun cinn mar mhórbhagairt slándála don Eoraip. Cé go bhfuil sé ríthábhachtach i gcónaí dlús a chur leis an maolú idirnáisiúnta ar an athrú aeráide chun an t-athrú aeráide contúirteach a chosc agus chun trasnú ESTPanna criticiúla a sheachaint — amhail titim an Imshruthaithe Iompaithe Fharascailtigh Atlantaigh, leá oighearchlúdaigh an Artaigh, agus leá na síorshioctha borrtha — ní mór an t-oiriúnú a bheith lárnach anois i bhfreagairt na hEorpa.

Tá géarghá ag an Eoraip le creat rialachais réamhghníomhach réamhbhreathnaitheach chun aghaidh a thabhairt ar na héifeachtaí cascáideacha agus iolraithe a bhaineann leis na pointí iompaithe sin a shárú. Áirítear leis sin pleanáil oiriúnaithe a neartú agus athléimneacht na sochaí a fhorbairt chun ullmhú do na suaití móra a d’fhéadfadh a bheith mar thoradh orthu.

Chun na rioscaí sin a bhainistiú go héifeachtach, ní mór don Eoraip infheistíocht a dhéanamh i gcórais luathrabhaidh agus i measúnuithe riosca a bhaineann go sonrach le ESTP ar féidir leo bonn eolais a chur faoi straitéisí láidre ullmhachta. Tá na huirlisí sin ríthábhachtach chun bonn taca a chur faoi Shásra an Aontais um Chosaint Shibhialta, faoi Straitéis an Aontais um an Oiriúnú don Athrú Aeráide, agus faoi Straitéis an Aontais um an Aontas Ullmhachta atá ar na bacáin.

Leagtar amach san achoimre bheartais seo moltaí nithiúla don Aontas Eorpach, dá Bhallstáit agus d’institiúidí idirnáisiúnta maidir leis na gníomhaíochtaí práinneacha is gá chun an bhearna rialachais réamh-mheasta a dhúnadh agus chun an t-oiriúnú a leabú i gcroílár chlár oibre na hEorpa maidir leis an tslándáil aeráide.