Spreagadh eacnamaíoch chun cosaintí tuilte cósta a ardú san Eoraip

D’fhéadfadh ardú chomh mór le méadar amháin nó níos mó teacht ar leibhéil farraige fhoircneacha (ESLanna) san Eoraip faoi dheireadh an chéid seo mar gheall ar an athrú aeráide. Cruthaíonn sé sin dúshláin shuntasacha chun pobail chósta a chosaint. Cuirtear i láthair sa staidéar seo anailís chuimsitheach ar chásanna cosanta atá éifeachtúil ó thaobh an gheilleagair de ar feadh imeallbhoird na hEorpa le linn an chéid seo. Baineadh úsáid as creat dóchúlaíoch lena gcomhtháthaítear ionsamhlúcháin dhinimiciúla de chomhpháirteanna uile LFS agus bá tuilte, samhaltú tionchair agus anailís costais is tairbhe ar chladáin ardaithe. Léiríonn na torthaí go bhféadfaí 83 % ar a laghad de dhamáiste ó thuilte san Eoraip a sheachaint trí chladáin a ardú ar bhealach atá éifeachtúil ó thaobh an gheilleagair de feadh 23.7 %-32.1 % d’imeallbhord na hEorpa, go háirithe i gcás ina bhfuil comhchathracha ardluacha ann. Athraíonn meánchóimheas tairbhe agus costais na n-infheistíochtaí san Eoraip ó 8.3 go 14.9 agus ar leibhéal na tíre tá sé sin idir 1.6 agus 34.3, le héifeachtúlachtaí níos airde i gcás ina mbeadh astaíochtaí gás ceaptha teasa ardleibhéil agus fás láidir socheacnamaíoch ann.

Bhí an anailís riosca tuilte cósta bunaithe ar an tsamhail LISCOAST (uirlis mheasúnaithe chomhtháite mhórscála ar leibhéal na farraige agus ar an gcósta) a d’fhorbair Airmheán Comhpháirteach Taighde an Choimisiúin Eorpaigh. Forbraíodh an creat modúlach chun measúnú a dhéanamh ar thionchair a bhaineann leis an aimsir i limistéir chósta san aeráid atá ann faoi láthair agus a bheidh ann amach anseo. Comhcheanglaíonn sé uirlisí samhaltaithe úrscothacha ar mhórscála agus tacair sonraí chun guais, neamhchosaint agus leochaileacht a chainníochtú agus rioscaí iarmhartacha a ríomh. Leathnaíodh an creat samhaltaithe a thuilleadh chun meastóireacht a dhéanamh ar chostais agus ar thairbhí a bhaineann le hairdí díog a mhéadú agus chun an dearadh oiriúnaithe is fearr a aimsiú bunaithe ar an nglanluach láithreach a uasmhéadú. Tá leibhéil fhoircneacha farraige feadh imeallbhoird na hEorpa atá ann faoi láthair agus a bheidh ann amach anseo bunaithe ar réamh-mheastacháin úrscothacha ar ardú leibhéal na farraige, tonnta, borradh stoirme agus taoidí le haghaidh astaíochtaí arda (RCP8.5) agus astaíochtaí measartha (RCP4.5).