Guaiseacha aeráide athraitheacha na hEorpa — tuarascáil idirghníomhach innéacs-bhunaithe EEA

Ós rud é go bhfuil teagmhais adhaimsire agus guaiseacha aeráide eile ag dul i méid ó thaobh minicíochta agus déine de ar fud na hEorpa, tá gá le faisnéis láidir chun rioscaí aeráide a mheasúnú agus chun pleanáil don oiriúnú. Tugtar forléargas sa tuarascáil idirghníomhach seo de chuid na Gníomhaireachta Eorpaí Comhshaoil (EEA) ar na hathruithe a tharla san am a chuaigh thart agus ar na hathruithe réamh-mheasta ar na guaiseacha aeráide is tábhachtaí san Eoraip agus ar an tionchar a bhíonn acu ar réigiúin na hEorpa. Is é is aidhm don tuarascáil tacú le tíortha Eorpacha a mbeartais maidir le hoiriúnú don athrú aeráide agus laghdú rioscaí tubaiste a chur chun feidhme faoin Dlí Aeráide Eorpach agus faoi Shásra an Aontais um Chosaint Shibhialta.

Déantar cur síos ar na príomhghuaiseacha a bhaineann leis an aeráid don Eoraip trí shraith roghnaithe innéacsanna, a chuir saineolaithe sa réimse le chéile ó na foinsí sonraí atá ar fáil. Tá an tacar de 32 innéacs eagraithe de réir 16 ghuais, iad grúpáilte i sé chatagóir atá ag teacht leis na ‘tiomántóirí tionchair aeráide’ a glacadh sa Séú Tuarascáil Mheasúnachta ón bPainéal Idir-Rialtasach ar an Athrú Aeráide (IPCC).

Leis an bhformáid ar líne is féidir na sonraí le haghaidh réigiúin éagsúla na hEorpa a léirshamhlú trí léarscáileanna idirghníomhacha. Tá tuilleadh faisnéise maidir leis na tacair sonraí fholuiteacha, na modhanna ríofa agus na léirshamhluithe ar fáil sa Pháipéar Teicniúil seo de chuid CCE/CCA. Is féidir faisnéis bhreise agus chomhlántach maidir le go leor guaiseacha a bhaineann leis an aeráid a fháil sa Taiscéalaí Sonraí Aeráide Eorpach, a d’fhorbair EEA agus C3S go comhpháirteach.