Bainistiú Iascaigh agus an tAthrú Aeráide san Aigéan Atlantach Thoir Thuaidh agus i Muir Bhailt

Tionóladh comhdháil ar “Bainistiú Iascaigh agus Athrú Aeráide san Aigéan Atlantach Thoir Thuaidh agus sa Mhuir Bhailt” in Bergen, an Iorua, 17-18 Aibreán 2008. Áiríodh ar na téamaí a cumhdaíodh athruithe fisiceacha agus bitheolaíocha a bhaineann leis an athrú aeráide sna haigéin agus na himpleachtaí do ghníomhaíochtaí iascaigh agus dobharshaothraithe agus dá mbainistiú inbhuanaithe. Thángthas ar an gconclúid gur gá straitéisí faireacháin a dhearadh chun athruithe criticiúla i speicis agus in éiceachórais a bhrath, bainistíocht fhreagrúil a chur chun feidhme ar féidir léi coigeartú tapa a dhéanamh, speicis agus éiceachórais atá íogair d’athruithe san aeráid a shainaithint, athruithe ar dháileadh a réamh-mheas agus freagairtí a ullmhú lena seachnaítear coinbhleachtaí bainistíochta, athléimneacht éiceachóras muirí agus stoc éisc a choinneáil ar bun (nó a atógáil), agus iarmhairtí socheacnamaíocha an athraithe aeráide ar iascaigh a thuiscint. Caithfidh an taighde a theastaíonn chun tacú leis an méid roimhe seo a bheith idirdhisciplíneach agus bunaithe ar éiceachórais. Mar sin féin, tá na hearnálacha iascaigh agus eolaíochta muirí sna tíortha Nordacha tearcmhaoinithe faoi láthair agus, dá bhrí sin, níl siad in ann a ngníomhaíochtaí a leathnú chun é sin a bhaint amach.