Ionchas Domhanda Bithéagsúlachta 5

Tá meath ag teacht ar an mbithéagsúlacht ar ráta nach bhfacthas a leithéid riamh roimhe seo, agus tá na brúnna is cúis leis an meath sin ag dul i ndéine. Ní chomhlíonfar aon cheann de Spriocanna Bithéagsúlachta Aichi ina n-iomláine, rud a chuirfidh baint amach na Spriocanna Forbartha Inbhuanaithe i mbaol agus a bhainfidh an bonn d’iarrachtaí chun aghaidh a thabhairt ar an athrú aeráide. Chuir paindéim COVID-19 béim bhreise ar thábhacht an chaidrimh idir daoine agus an dúlra, agus meabhraíonn sí na hiarmhairtí móra ar fholláine agus ar mharthanas a d’fhéadfadh a bheith mar thoradh ar chailliúint leanúnach na bithéagsúlachta agus ar dhíghrádú na n-éiceachóras.

Cuirtear i láthair sa tuarascáil seo roinnt samplaí den dul chun cinn a d’fhéadfadh, dá méadófaí iad, tacú leis na hathruithe claochlaitheacha is gá chun fís 2050 maidir le maireachtáil ar aon dul leis an dúlra a bhaint amach. Tá fianaise ann cheana féin maidir le roinnt aistrithe lena léirítear an bealach chuig na cineálacha athruithe is gá, cé gur i réimsí teoranta gníomhaíochta atá siad. Scrúdaítear sa tuarascáil conas is féidir na haistrithe sin a mhacasamhlú agus tógáil orthu. Tá roghanna ar fáil don phobal domhanda a d’fhéadfadh stop a chur le cailliúint na bithéagsúlachta agus í a aisiompú ag an am céanna, teorainn a chur leis an athrú aeráide agus feabhas a chur ar an gcumas dul in oiriúint di agus spriocanna eile amhail slándáil fheabhsaithe bia a bhaint amach. Áirítear leis an meascán gníomhaíochtaí sin dlús mór a chur leis na hiarrachtaí chun an bhithéagsúlacht a chaomhnú agus a athbhunú, aghaidh a thabhairt ar an athrú aeráide ar bhealaí a chuireann teorainn leis an ardú teochta domhanda gan brúnna breise neamhbheartaithe a chur ar an mbithéagsúlacht, agus athrú ó bhonn a dhéanamh ar an mbealach a ndéanaimid earraí agus seirbhísí, go háirithe bia, a tháirgeadh, a thomhailt agus a thrádáil, ar earraí agus seirbhísí iad a bhraitheann ar an mbithéagsúlacht agus a mbíonn tionchar acu uirthi.

Tuairiscítear freisin dul chun cinn maidir le Spriocanna Bithéagsúlachta Aichi a bhaint amach agus cur chun feidhme Phlean Straitéiseach 2011-2020 don Bhithéagsúlacht. Cuirtear i dtábhacht sa tuarascáil freisin go bhfuil gá le réitigh chun cur chuige comhtháite a lorg lena dtugtar aghaidh ag an am céanna ar chaomhnú éagsúlacht ghéiniteach, speicis agus éiceachórais an phláinéid, ar chumas an dúlra tairbhí ábhartha a chur ar fáil do shochaithe an duine, agus ar na naisc leis an dúlra nach bhfuil chomh hinláimhsithe céanna ach a bhfuil ardmheas orthu agus a chuidíonn lenár bhféiniúlachtaí, ár gcultúir agus ár gcreideamh a shainiú.

Tá achoimre do lucht déanta beartas sa tuarascáil freisin.