Páipéar Uaine maidir le hárachas tubaistí nádúrtha agus tubaistí de dhéantús an duine

Mar is amhlaidh le go leor réigiún eile ar domhan, tá an tAontas Eorpach leochaileach do bheagnach gach cineál tubaiste nádúrtha. Ní hamháin go mbíonn tubaistí ina gcúis le caillteanais dhaonna ach déanann siad dochar freisin do luach na mbilliún euro gach bliain, rud a dhéanann difear don chobhsaíocht eacnamaíoch agus don fhás eacnamaíoch. D’fhéadfadh éifeachtaí trasteorann a bheith ag tubaistí agus d’fhéadfadh siad a bheith ina mbagairt ar limistéir iomlána i dtíortha comharsanachta. Fiú i gcás ina bhfuil na costais a bhaineann le mórthubaistí comhchruinnithe go háitiúil, mura gcumhdaítear na costais go leordhóthanach le hárachas, d’fhéadfadh ualaí móra fioscacha a bheith ar Bhallstáit aonair, rud a d’fhéadfadh a bheith ina chúis le míchothromaíochtaí inmheánacha agus seachtracha. Dá bhrí sin, is saincheist thábhachtach í sin do shaoránaigh, do chuideachtaí agus do rialtais ar fud an Aontais.

Cuirtear roinnt ceisteanna sa Pháipéar Uaine seo maidir le leordhóthanacht agus infhaighteacht árachais iomchuí tubaiste agus gabhann sé leis an Teachtaireacht dar teideal "Straitéis AE maidir le hoiriúnú don athrú aeráide". Is é an cuspóir atá ann feasacht a mhúscailt agus measúnú a dhéanamh ar cé acu a d’fhéadfadh nó nach bhféadfadh gníomhaíocht ar leibhéal an Aontais a bheith iomchuí nó údar a bheith léi chun feabhas a chur ar an margadh le haghaidh árachas tubaiste san Aontas Eorpach. Ar bhonn níos ginearálta, leathnóidh an próiseas sin an bonn eolais freisin, cuideoidh sé le hárachas a chur chun cinn mar uirlis bainistithe tubaistí agus, ar an gcaoi sin, cuirfidh sé le hathrú i dtreo cultúr ginearálta maidir le rioscaí tubaiste a chosc agus a mhaolú, agus tabharfaidh sé tuilleadh sonraí agus faisnéise isteach.