Glasú: scéim tacaíochta ioncaim níos casta, nach bhfuil éifeachtach ó thaobh an chomhshaoil de go fóill

Bíonn tionchar diúltach ag an talmhaíocht, go háirithe an dianfheirmeoireacht, ar an gcomhshaol agus ar an aeráid. In 2015, tugadh isteach glasú — íocaíocht dhíreach lena dtugtar luach saothair d’fheirmeoirí as cleachtais feirmeoireachta a théann chun tairbhe do cháilíocht na hithreach, do cheapadh carbóin agus don bhithéagsúlacht — mar bhealach chun feidhmíocht chomhshaoil agus aeráide Chomhbheartas Talmhaíochta an Aontais a fheabhsú. Ní dócha go gcomhlíonfaidh an glasú, mar atá á chur chun feidhme faoi láthair, an cuspóir sin, go príomha mar gheall ar an leibhéal íseal ceanglas, a léiríonn an gnáthchleachtas feirmeoireachta den chuid is mó. Meastar sa tuarascáil nach bhfuil athrú tagtha ar chleachtas feirmeoireachta ach ar thart ar 5 % de thalamh feirme uile an Aontais mar thoradh ar ghlasú. Soláthraíodh roinnt moltaí maidir le conas ionstraimí comhshaoil níos éifeachtaí a dhearadh don Chomhbheartas Talmhaíochta tar éis 2020.