ICARUS IWRM le haghaidh Oiriúnú don Athrú Aeráide in Éiceachórais Shóisialta Tuaithe i nDeisceart na hEorpa

Déanann an tuarascáil seo achoimre ar éachtaí deiridh thionscadal ICARUS. Bhí sé d’aidhm ag tionscadal ICARUS moltaí a fhorbairt do lucht ceaptha beartas chun éifeachtúlacht úsáid an uisce sa talmhaíocht a mhéadú trí anailís agus tuiscint a fháil ar dtús ar ghnéithe bithfhisiceacha (infhaighteacht acmhainní uisce), socheacnamaíocha (déimeagrafaic, fostaíocht, úsáid talún, agus iomaíocht le haghaidh úsáid uisce), agus institiúideacha (an Treoir Réime maidir le hUisce, beartais talmhaíochta agus chomhshaoil, beartais agus gníomhaithe pleanála críochaí) de bhainistiú inbhuanaithe uisce agus ansin trí straitéisí, cleachtais agus uirlisí oiriúnaithe nuálacha a shainaithint chun uisce a shábháil i gcórais táirgthe uiscithe, a d’fhéadfaí a scaipeadh freisin i dtíortha eile sa Mheánmhuir. Ag díriú ar thrí chás-staidéar san Iodáil, sa Spáinn agus sa Phortaingéil, a raibh a dhúshláin féin ag gach ceann acu, d’fhorbair agus thástáil an tionscadal modh agus uirlis tacaíochta cinnteoireachta chun bainistiú an tsoláthair agus an éilimh ar acmhainní uisce a chomhtháthú i gcomhthéacs athruithe domhanda agus faoi chuimsiú cur chuige comhtháite agus rannpháirteach, mar réiteach oibríochtúil chun an t-athrú aeráide a phríomhshruthú i mbeartais. Sainaithníodh i dtionscadal ICARUS bearnaí sa cheapadh beartas atá ann faoi láthair chun acmhainní uisce a bhainistiú ar bhealach inbhuanaithe agus forbraíodh a thograí féin le haghaidh ceapadh beartas éifeachtach fónta.
Ullmhaíodh an tuarascáil seo faoi chuimsiú Thionscnamh Maoinithe IWRM-NET, agus é mar aidhm aige faisnéis ábhartha a sholáthar agus plé a spreagadh orthu siúd a bhfuil suim acu i mbainistiú comhtháite acmhainní uisce (IWRM).