Inathraitheacht inmheánach i dteochtaí samhraidh na hEorpa ag 1.5 °C agus 2 °C den téamh domhanda

Is é is aidhm do Chomhaontú Pháras an téamh domhanda a theorannú ag 2 °C i ndáil le dálaí réamhthionsclaíocha, ag 1.5 °C más féidir. Fuarthas amach sa staidéar taighde nach mbeidh difríocht 0.5 °C i dteochtaí samhraidh na hEorpa mar thoradh ar an difríocht dhomhanda 0.5 °C ar bhonn bliantúil, ach go mbeidh an difríocht níos mó. I gcomparáid le téamh domhanda 1.5 °C, beidh meánteocht mhíosúil an tsamhraidh thart ar 1 °C níos airde ar fud na hEorpa mar thoradh ar 2 °C den téamh domhanda. Ar bhonn laethúil, is dócha go mbeidh na difríochtaí i dteochtaí foircneacha níos mó fós.

Ag téamh domhanda 2 °C is féidir uasteochtaí laethúla foircneacha a bhaint amach atá suas le 1.5 °C níos airde ná na huasteochtaí ag téamh domhanda 1.5 °C, de réir samhailstaidéir a rinneadh le déanaí ar inathraitheacht theocht an tsamhraidh ag na leibhéil téimh dhomhanda sin. Is é is cúis leis sin go bhfuil an inathraitheacht i dteochtaí an tsamhraidh níos airde ag téamh domhanda 2 °C i gcomparáid le 1.5 °C. Mar thoradh air sin, ní féidir an 10 % de theochtaí uasta an tsamhraidh is foircní i ndomhan atá níos teo ná 2 °C a bhaint amach nuair a chuirtear srian 1.5 °C ar an téamh domhanda. D’fhéadfadh sé nach mbeadh an chuma sin ar 10 %, ach bheadh na himeachtaí sin ag freagairt do na tonnta teasa is foircní agus is déine, na cinn a bhfuil na hiarmhairtí is criticiúla acu.

Léiríonn na torthaí sin nach féidir aimplitiúid na dteagmhas teochta foircní a rialú amach anseo trí theorainneacha meánteochta domhanda a bhunú. Nuair a dhéantar meastóireacht ar thionchair an athraithe aeráide, ba cheart raon na ndálaí foircneacha teochta a eascraíonn as inathraitheacht aeráide a chur san áireamh freisin.

Is iad samhraí teo na bliana 2003 agus 2017 na samhraí tipiciúla Eorpacha ar leibhéal téimh dhomhanda 1.5 °C. Beidh teochtaí samhraidh 2003 san Eoraip coitianta timpeall na 2040idí. Bhí teochtaí an tsamhraidh san Eoraip in 2010 níos foircní: tá na luachanna sin inchomparáide le meánmhí an tsamhraidh i ndomhan atá 2 °C níos teo. Faoin téamh domhanda 2 °C, bheadh gach mí samhraidh eile san Eoraip níos teo ná an mhí samhraidh is teo ar taifead sna dálaí aeráide atá ann faoi láthair.