Athléimneacht infheistíochtaí móra agus bonneagar criticiúil san Eoraip i gcoinne an athraithe aeráide

Is é is aidhm don tuarascáil meastóireacht a dhéanamh ar an tionchar atá ag teagmhais fhoircneacha aeráide faoi láthair agus a bheidh acu amach anseo ar stoc reatha na mbonneagar criticiúil san Eoraip, agus ar infheistíochtaí réigiúnacha faoin mBeartas Comhtháthaithe don tréimhse 2007-2013. Le dáileadh na gcostas eacnamaíoch sa spás agus i measc earnálacha, tugtar léiriú ar na réigiúin agus ar na hearnálacha a bhféadfadh iarrachtaí suntasacha a bheith rompu chun bonneagair chriticiúla atá ann faoi láthair agus atá beartaithe a dhéanamh athléimneach in aghaidh na haeráide a bheidh ann amach anseo. Breithníodh na hearnálacha seo a leanas: fuinneamh, iompar, tionsclaíocht, sóisialta. Sainaithníodh cúig dhúshlán bhunúsacha eolaíocha, a spreag na gníomhaíochtaí taighde straitéiseacha:

1. Tuiscint a fháil ar an gcaoi a bhforbróidh an iliomad dálaí foircneacha aeráide san Eoraip san aonú haois is fiche;
2. Tacar sonraí de bhonneagair chriticiúla atá ann cheana atá comhleanúnach ó thaobh spáis de a fhorbairt;
3. Íogaireacht na mbonneagar criticiúil agus na dtionscadal arna gcistiú ag an Aontas i leith guaiseacha aeráide a chinneadh;
4. Measúnú a dhéanamh ar thionchair ar scála uile-Eorpach go comhsheasmhach agus i gcomparáid le hearnálacha éagsúla agus guaiseacha a bhaineann leis an aeráid;
5. An costas a bhaineann le hoiriúnú bonneagar a mheas.