Conairí athléimneacha: earnáil TFC a chur in oiriúint don athrú aeráide

Is iad cuspóirí na tuarascála seo iniúchadh a dhéanamh ar thionchair an athraithe aeráide ar earnáil na teicneolaíochta faisnéise agus cumarsáide (TFC) agus ar an acmhainneacht maidir le hoiriúnú, lena n-áirítear an gá atá le caighdeáin nua a fhorbairt.

Cé gur fiosraíodh an rannchuidiú TFC le hastaíochtaí carbóin a laghdú, le héifeachtúlacht fuinnimh, le faireachán a dhéanamh ar phatrúin agus ar imeachtaí a bhaineann leis an aeráid, agus le cleachtais oiriúnaitheacha a chur chun feidhme (i measc freagairtí eile a bhaineann leis an aeráid) ó thús na 2000idí i leith, is lú i bhfad an t-eolas atá ann faoi oiriúnú na hearnála TFC féin do thionchair an athraithe aeráide.

Is é is aidhm don tuarascáil seo feasacht a mhúscailt maidir leis an ngá atá le straitéisí a dhearadh agus a chur chun feidhme don earnáil chun ullmhú níos fearr do thionchair na léirithe aeráide gearrthéarmacha agus fadtéarmacha, chun freagairt níos fearr a thabhairt orthu agus chun oiriúnú dóibh ar bhealach níos fearr. Tugtar forbhreathnú ann ar na tionchair, na deiseanna agus na dúshláin a bhaineann leis an athrú aeráide do pháirtithe leasmhara san earnáil; sainaithnítear ann bearta oiriúnaitheacha atá ann cheana agus atá ag teacht chun cinn agus soláthraítear ann gníomhaíochtaí molta chun cur chuige earnáil TFC i leith an oiriúnaithe a neartú. Áirítear san anailís samplaí a sainaithníodh trí shuirbhé a rinneadh i measc príomhpháirtithe leasmhara earnála a bhfuil baint acu le TFC, le hinbhuanaitheacht chomhshaoil agus le straitéisí maidir leis an athrú aeráide. Pléitear caighdeáin nua chun gníomhaíocht oiriúnaitheach a chothú san earnáil. Áirítear samplaí de Sheicliosta Measúnaithe Riosca maidir le hOiriúnú don Athrú Aeráide, Roghanna Oiriúnaithe agus Plean Oiriúnaithe don Athrú Aeráide a d’fhéadfaí a leathnú lena gcur san áireamh i gcaighdeáin. 

Is é tátal na tuarascála seo go mbeidh tionchair dhosheachanta ag an athrú aeráide a mbeidh tionchar díreach agus indíreach acu ar earnáil TFC. Sa chomhthéacs sin, beidh cleachtais oiriúnaitheacha mar chuid den ‘ghnáthshaol nua’ d’oibríochtaí gnó ar fud an domhain, lena n-áirítear iad siúd in earnáil TFC.