Dul i ngleic le héifeachtaí an athraithe aeráide ar an tsláinte sa Mheánmhuir agus sna réigiúin máguaird

Is toradh í an tuarascáil seo ar cheardlann a d’eagraigh Comhairle Chomhairleach Eolaíochta na nAcadamh Eorpach (EASAC) i gcomhpháirtíocht leis an gComhpháirtíocht Idir-Acadamhach (IAP) agus le hInstitiúid na Cipire, chun measúnú a dhéanamh ar an mbonn eolaíochta agus chun meastóireacht a dhéanamh ar roghanna maidir le sláinte an duine a chosaint agus a chur chun cinn i bhfianaise an athraithe aeráide i mór-réigiún na Meánmhara (is é sin, tíortha atá ar theorainn na Meánmhara agus a gcomharsana).

Ba é aidhm chomhchoiteann na ceardlainne saincheisteanna agus ceachtanna atá ag teacht chun cinn don réigiún a roinnt, measúnú a dhéanamh ar thábhacht choibhneasta na dtionchar, grúpaí a ndéantar difear ar leith dóibh a shoiléiriú, agus díriú ar réitigh, chun cabhrú le comhairle a fhorbairt do lucht déanta beartas. Dearadh an cheardlann le raon feidhme leathan, go geografach agus i dtéarmaí na bpríomhthopaicí. Áiríodh orthu sin éifeachtaí eachtraí adhaimsire, ganntanas uisce, slándáil bia, galair thógálacha, truailliú aeir, agus saincheisteanna sláinte na bpobal easáitithe.

I measc phríomhchodanna na tuarascála seo tá réamhrá ar na dúshláin a bhaineann leis an athrú aeráide agus leis an tsláinte; forbhreathnú ar chur i láthair na dtíortha maidir leis an athrú aeráide, sláinte agus beartas; agus plé ginearálta agus díriú ar dhúshláin bheartais.