Dinimic Chríochach san Eoraip: Guaiseacha Nádúrtha agus an tAthrú Aeráide i Réigiúin na hEorpa

Tá dhá mhórdhúshlán dhomhanda ag an Eoraip faoi láthair. Is é ceann acu an ghéarchéim eacnamaíoch agus airgeadais. Is é an ceann eile an t-athrú de réir a chéile ar dhálaí aeráide. Amhail tionchair na géarchéime eacnamaíche agus airgeadais, bíonn tionchar ag tionchair an athraithe aeráide arb iad próisis nádúrtha agus gníomhaíochtaí an duine is cúis leo, ar chríoch na hEorpa agus beidh tionchar acu uirthi. Mar sin féin, ní dhéantar difear do na réigiúin agus na cathracha uile ar an mbealach céanna agus a dhéanfar difear dóibh. In áiteanna áirithe is beag tionchar a bhíonn ag na dúshláin sin. In áiteanna eile, treiseoidh siad a chéile sa chás is measa agus tabharfaidh siad dúshlán tromchúiseach don fhás agus don fhostaíocht amach anseo.

Tá an éagsúlacht tionchair sin laistigh den Eoraip an-tábhachtach le tuiscint chun na gníomhaíochtaí is fearr is féidir a mhúnlú ar an leibhéal náisiúnta, ar an leibhéal réigiúnach agus ar an leibhéal áitiúil. Tá gá le freagairtí fianaise-bhunaithe atá bunaithe ar thaighde, anailís agus sonraí atá láidir agus inchomparáide lena gcumhdaítear críoch iomlán na hEorpa, a réigiúin agus a cathracha. Bunaíodh Clár ESPON 2013 chun an cúram áirithe sin a chur i gcrích. Is é is aidhm don tuarascáil seo roinnt roghanna beartais atá difreáilte ó thaobh críche de agus atá nasctha le forbairt uirbeach agus réigiúnach a shainaithint chun dul i ngleic leis an athrú aeráide agus le rioscaí a bhaineann le guais nádúrtha.