An 5ú tuarascáil ar chur chun feidhme na Creat-Treorach Uisce agus na Treorach maidir le Tuilte

Déantar measúnú sa tuarascáil ar phleananna bainistíochta abhantraí na mBallstát a ritheann ó 2015 go 2021. Tagann sé sna sála ar thuarascáil ón nGníomhaireacht Eorpach Chomhshaoil in 2018 ina léirítear go bhfuil feabhas ag teacht de réir a chéile ar cháilíocht an uisce san Eoraip, a bhuí le cóireáil fuíolluisce uirbigh, truailliú laghdaithe ón talmhaíocht agus líon níos mó aibhneacha agus lochanna atá ag filleadh ar staid níos nádúrtha. Ach tá fadhbanna fós ann ar fud an Aontais maidir le truailliú ceimiceach, ró-astarraingt uisce, go háirithe i gcás na talmhaíochta, agus na mílte bacainn a chuireann bac ar an sreabhadh nádúrtha d’aibhneacha, rud a mbíonn iarmhairtí diúltacha aige ar cháilíocht an uisce.

Áirítear ar thorthaí an lae inniu feabhsuithe suntasacha ar eolas agus ar thuairisciú ar an gCreat-Treoir Uisce i gcomparáid leis an timthriall tuairiscithe roimhe seo. Thuairiscigh níos mó Ballstát go tráthúil, le faisnéis níos cuimsithí, níos ábhartha agus níos iontaofa.